Սուխումիում Կառավարական շենքերը գրաված ցուցարարները չեն բավարարվում
Աբխազիայում Ռուսաստանի հետ ներդրումային համաձայնությանը դեմ ցուցարարներն այսօր գրավել են կառավարության շենքը։ Ավելի ուշ վերահսկողություն են սահմանել ամբողջ կառավարական համալիրի վրա։ «Ուժային ստորաբաժանումների մի մասը ժողովրդի կողքին է», – գրում են տեղական տելեգրամ ալիքները։
Ցուցարարները պահանջում են համաձայնագիրը ստորագրած նախագահ Ասլան Բժանիայի հրաժարականը։
Ցույցերի մեկնարկից ժամեր անց ինքնահռչակ հանրապետության ղեկավարի մամուլի ծառայությունը հայտարարել էր, որ Բժանիայի աշխատակազմը փաստաթղթեր է պատրաստում «Աբխազիայի Հանրապետության տարածքում ռուսական իրավաբանական անձանց կողմից ներդրումային ծրագրերի իրականացման վերաբերյալ Աբխազիայի հանրապետության կառավարության և Ռուսաստանի Դաշնության կառավարության միջև համաձայնագրի վավերականացման մասին» օրենսդրական նախաձեռնությունը խորհրդարանից հետ կանչելու մասին։
«Որոշումը կայացվել է երկրում ստեղծված իրադրությունը կայունացնելու նպատակով», – ասվում է հաղորդագրության մեջ։
Ընդդիմությունը, սակայն, խստացրել է բողոքի ակցիայի պահանջները։ Ցուցարարները չեն պատրաստվում դադարեցնել ակցիան, քանի դեռ Բժանիան հրաժարական չի ներկայացրել։
Առավոտյան ցուցարարների ու ոստիկանության ներկայացուցիչների միջև բախումներ են եղել։ Ակցիայի մասնակիցներն ուժայինների ուղղությամբ ձվեր և շշեր էին նետում։ Շինարարական մեքենաների միջոցով ցուցարարները հեռացրել էին կառավարության շենքի ցանկապատը։
Հակառավարական ակցիայի մասնակիցների հետ հանդիպման էր իջել Ներքին գործերի նախարար Ռոբերտ Կուիտը և Ազգային անվտանգության ծառայության ղեկավար Դմիտրի Կուչուբերիան։ Ցուցարարներին լսելուց հետո պաշտոնյաները խոստացել էին պահանջների մասին զեկուցել նախագահին։
Ներդրումային նախագծերին վերաբերող ռուս-աբխազական համաձայնագիրը հոկտեմբերի 30-ին ստորագրվել է Մոսկվայում։ Համաձայնագիրը լուրջ արտոնություններ է տալիս ռուսական խոշոր ներդրողներին։ Օրինակ, կապիտալ շինարարության օբյեկտների շահագործման առաջին 8 տարիների ընթացքում նրանք ազատվելու են գույքահարկից և շահութահարկից։
Հաշտության և քաղաքացիական իրավահավասարության հարցերով նախկին պետնախարար, կոնֆլիկտաբան Պաատա Զաքարեիշվիլին «Էխո Կավկազայի» հետ զրույցում այս համաձայնագիրը նկարագրել է որպես «Ռուսաստանի՝ Աբխազիայի տնտեսության նկատմամբ վերահսկողությունն ամրապնդելու հերթական փորձը»։
«Ցանկացած ռուսաստանցի օլիգարխ, որը 2 միլիարդ ռուբլու ներդրում կկատարի, Աբխազիայում կստանա փաստացի անսահմանափակ իրավունքներ՝ երկարաժամկետ արտոնություններ, այդ թվում ազատում հարկերից, իշխանություններից բիզնեսի լիակատար պաշտպանություն և ենթակառուցվածքների սպասարկում պահանջելու հնարավորություն և այլն։ Այս արտոնությունները ընդհանրապես չեն տարածվում աբխազ գործարարների վրա», – բացատրել է Հաշտության և քաղաքացիական իրավահավասարության հարցերով նախկին պետնախարար, կոնֆլիկտաբան Պաատա Զաքարեիշվիլին։
Սպասվելիք օրենսդրական բարեփոխումները անբարենսպաստ պայմաններ են ստեղծում տեղական բիզնեսի համար և արտոնյալ դիրք են տալիս ռուսական կապիտալին։ Ընդդիմությունը սա Աբխազիայի տնտեսական անեքսիայի մաս է համարում։
The post Սուխումիում Կառավարական շենքերը գրաված ցուցարարները չեն բավարարվում first appeared on Epress.am.