ერთი დღის განმავლობაში ორჯერ დარღვეული საჰაერო სივრცე - საქართველოს კონტროლირებად საჰაერო სივრცეში რუსული საფრენი აპარატები გამოჩნდა
კურიერის კამერამ დღის მეორე ნახევარში სოფელ მერეთში რუსული უპილოტო საფრენი აპარატი დააფიქსირა.
მცირე ზომის თვითმფრინავმა საოკუპაციო ზოლი გადმოკვეთა და რამდენიმე წუთის განმავლობაში საქართველოს კონტროლირებად საჰაერო სივრცეში იმყოფებოდა.
თვითმფრინავის გამოჩენამდე საჰაერო სივრცე რუსულმა ვერტმფრენმაც დაარღვია, რომელიც სოფელ მერეთისა და ზარდიანთკარის თავზე იმ დროს გამოჩნდა, როდესაც ადგილობრივები მიწას ამუშავებდნენ.
საქართველოს კონტროლირებადი საჰაერო სივრცის დარღვევის ფაქტი ჯერ თავდაცვის, შემდეგ კი საგარეო უწყებამაც დაადასტურა.
განცხადებაში, რომელიც დიპლომატიურმა უწყებამ გაავრცელა, წერია, რომ საჰაერო სივრცე რუსულმა უპილოტო საფრენმა აპარატმა გუშინაც დაარღვია.
საქართველოს მიერ კონტროლირებადი საჰაერო სივრცის დარღვევის შესახებ ინფორმაცია აქვთ საპარლამენტო უმრავლესობაში.
ქართულ ოცნებაში მიიჩნევენ, რომ თბილისის პასუხი დიპლომატიური უნდა იყოს.
ოპოზიცია კი მიიჩნევს, რომ საქართველოს მთავრობის პოზიცია საჰაერო სივრცის დარღვევაზე უფრო პრინციპული უნდა იყოს.
ავტორი: დავით კაკულია.