Օմբուդսմենը հնարավոր ընտրախախտումների վերաբերյալ դիմել է իրավապահ մարմիններին
ՄԻՊ-ի գրասենյակի փոխանցմամբ՝ ներկայացնելով կասկած հարուցող իրենց հայտնի բոլոր միջադեպերի ցանկը, օմբուդսմենը խնդրել է իրավապահ մարմիններին իրենց իրավասությունների շրջանում ուսումնասիրել նշված դեպքերը, ձեռնարկել համապատասխան միջոցներ և հնարավորինս սեղմ ժամկետներում ներկայացնել պատասխանները։
Ըստ գրության, դեկտեմբերի 6-ին՝ հանրաքվեի ժամանակ տեղի ունեցած խախտումների վերաբերյալ գրասենյակը ստացել է 67 ահազանգ: «Բացի նշված ահազանգերից, եղել են նաև համանման խախտումների վերաբերյալ բազմաթիվ հրապարակումներ, որոնց իսկությունը դեռևս ամբողջությամբ ստուգված չէ: Հնարավոր խախտումների մասին այս տեղեկությունները խորապես մտահոգել են մեզ և քվեարկությանը մասնակցած բազմաթիվ քաղաքացիների, ինչպես նաև առաջացրել են առանձին քաղաքական ուժերի ու միջազգային որոշ գործընկերների անհանգստությունը», - ասված է օմբուդսմենի գրությունում։
Ըստ գրասենյակի հաղորդագրության, ստացած ահազանգերից ու տարածված մյուս տեղեկություններից առանձնացվել են հատկապես այն խնդիրներն ու միջադեպերը, որոնք ամենախնդրահարույցն են և առերևույթ պարունակում են հանցագործության հատկանիշներ:
«Չափազանց կարևոր է նաև, որ բոլոր ահազանգերի ու գանգատների մանրակրկիտ ստուգման արդյունքում բացահայտվեն նաև վարչական ռեսուրսի օգտագործման բոլոր դեպքերը, և նման չարաշահում թույլ տված պաշտոնատար անձինք ևս ենթարկվեն խստագույն պատասխանատվության», - ասված է գրությունում: