ԼՂ նախագահ. Ղարաբաղը պետք է իր արժանի տեղը զբաղեցնի միջազգային հանրությունում
Ղարաբաղի նախագահի պաշտոնական կայքէջի փոխանցմամբ՝ ուղերձում մասնավորապես ասված է. - «Այս տոնը հատկապես կարևոր է մեր ժողովրդի համար, քանի որ խորհրդանշում է ազատ ու անկախ, ժողովրդավարական ու իրավական պետություն կառուցելու նրա ձգտումը, պետություն, որտեղ գերակա է օրենքը, որտեղ պաշտպանված են մարդու իրավունքներն ու ազատությունները, քաղաքացիների և պետության օրինական շահերն ու անվտանգությունը»։
Բակո Սահակյանը նշել է, որ «1991 թվականին անկախություն հռչակած Ղարաբաղն անցել է պարտադրված պատերազմի միջով, հաղթահարել է բազում դժվարություններ ու փորձություններ, բայց և ունեցել փառավոր հաղթանակներ ու նվաճումներ»:
«Անկախ պետության կայացման ճանապարհին կարևոր ձեռքբերում էր մեր երկրի մայր օրենքի` Սահմանադրության ընդունումը: 2006 թվականի հանրաքվեն դարձավ ևս մեկ վկայությունն այն բանի, որ մեր ժողովրդի ընտրած ուղին ճիշտ է ու հաստատուն, և որ ոչ ոք ու ոչ մի բան չեն կարող կասեցնել նրա ընթացքը: Դա պետք է քաջ գիտակցի նաև մեր հակառակորդը, ով պահ անգամ չի վարանում դիմելու սադրիչ գործողությունների», - ասել է ԼՂ նախագահը:
«Հայաստանի և Սփյուռքի մեր քույրերի ու եղբայրների հետ ձեռք ձեռքի մենք այսուհետ էլ անելու ենք ամեն ինչ Ղարաբաղի պետականության շարունակական ամրապնդման, մեր ժողովրդի անվտանգության ու բարեկեցության ապահովման, պաշպանունակության մակարդակի բարձրացման, տնտեսության զարգացման, մարդկանց կենսապայմանների բարելավման ուղղությամբ: Ղարաբաղը պետք է դառնա զարգացած ու ժամանակակից հանրապետություն և իր արժանի տեղը զբաղեցնի միջազգային հանրության շարքում», - ասված է Բակո Սահակյանի ուղերձում: