"ეს არის ფული, რომელსაც ჩვენ ვართმევთ მშრომელებს და ამ ფულს ჭამს გაზულუქებული ბიუროკრატია“ - ზურაბ ჯაფარიძე

პარლამენტის ბიურო ამ წუთებში მიმდინარე კვირის სამუშაო გრაფიკს განიხილავს. დეპუტატებმა მომავალი წლის ბიუჯეტი სწორედ ამ კვირაში უნდა დაამტკიცონ და ამისთვის საჭირო გახდება ქუთაისში პლენარული სხდომის ჩატარება. სავარაუდოდ, მომავალი წლის მთავარ საფინანსო დოკუმენტს კანონმდებლები პარასკევს მიიღებენ.

„ეს იქნება ბიუჯეტი, რომელიც ვერ ერგება იმ მოთხოვნებს, რომელიც აქვს ჩვენს საზოგადოებას. ის პენსიების ზრდა, თუნდაც 20 ლარით ძალიან ბუტაფორიულია და აცდენილია რეალობას,“ - განმარტავს თავისუფალი დემოკრატების ლიდერი ირაკლი ალასანია.

ახალი პოლიტიკური ცენტრის წარმომადგენელს მთავარ პრობლემად მიაჩნია, რომ ბიუჯეტში თანხები გაბერილია.

"ჩვენ არაფერში გვჭირდება 10 მილიარდ 145 მილონ ლარიანი ბიუჯეტი. ეს არის ფული, რომელსაც ჩვენ ვართმევთ მშრომელებს და ამ ფულს ჭამს გაზულუქებული ბიუროკრატია,“ - განაცხადა ზურაბ ჯაფარიძემ.  

უმრავლესობის წარმომადგენლის თამაზ მეჭიაურის განცხადებით, ოპოზიცია იმისთვის არსებობს, რომ ყველაფერი გააკრიტიკოს.

„არსებობს შედარებით პატიოსანი ოპოზიცია, რომელიც შენთან თანამშრომლობს და გაუმჯობესებაში ხელს გიწყობს. მეორე კატეგორიაა რაც არ უნდა გააკეთო ის მაინც საწინააღმდეგოს იტყვის. სამწუხაროდ ჩვენი ოპოზიცია მეორე კატეგორიას მიეკუთვნება,“ - განმარტა თამაზ მეჭიაურმა.

პროექტის მიხედვით, პენსია მომავალი წლის ივლისიდან 180 ლარამდე იზრდება. საპარლამენტო უმცირესობა კი 50 ლარიან ზრდას მოითხოვს. დეპუტატების თქმით, ბიუჯეტში ამისთვის საკმარისი რესურსია.