Россиясо поладови «Твой герой» теварсевксэнь топавтомась, кона алтави СВО-нь ветерантнэнень. Сонзэ эйс совицятне ютыть патриотической куншкакуротнес, тонавтомань ды од ломанень организациятнес седе тов важодемга профессиональной анокстамонь программанть, истяжо сыненст максови психологиянь кирдема. Мордовиясто Масторонь ванстыцятне вейсэндить федеральной прявт арсемантень.
Максим Царев ды Андрей Ерёмин специальной военной операциянь ветерантнэ свалшане кирдить сюлмавомат «Масторонь ванстыцят» региононь филиалонть ды Республикань од ломанень куншкакуронть марто. Ушодыця ушмантнэ вастневить од ломантнень марто – ютавтнить кемечинь тонавкст, явить мель спортонь ды культурань покшчитненень.
«Патриотизмань эрьва кодат покшчитнень, организациятнень ды программматнень кастомась — те эряви минек туртов, од ломантнень масторонтень вечкемань кастоманть кис», — тешктсызе специальной военной операциянь ветеранось Андрей Ерёмин.
«Мон ульнинь Московсо «Твой герой» весе Россиянь форумсо. Ёвтан покш сюкпря те улеманть кис – улемс вейке бажамонтень мелень явиця виев ломантнень юткосо. «Твой герой» теварсевкссэ улемась – алкукс лия ёнов а молиця ёрокчи», — витьксты Максим Царев.
Специальной военной операциянь ветеранось тонавтни Плеханов лемсэ Россиянь экономикань университетэнть лувсо. Тонавкстнэ ютыть дистант вельде, анокстамось прядови ожоковонь куншкасто. Сундерьковсто республикасто специальной военной операциянь ветерантнэ явить мель «Твой герой» весе Россиянь семинаронтень.
