Վրաստանն այսօր. ՌԴ-ը «օկուպանտից» վերածվում է «անվտանգության աղբյուրի»
Վրացական հասարակությունում լուրջ տրանսֆորմացիաներ են տեղի ունենում Ռուսաստանի ընկալման առումով: Աբխազիայի ու Հարավային Օսեթիայի շուրջ հակամարտությունները, նրանց ճանաչումը ՌԴ-ի կողմից, ինչպես նաև Մոսկվայի ընդհանուր քաղաքականությունը վերջին տարիների ընթացքում Վրաստանում ամրապնդել էր Մոսկվայի` որպես "օկուպանտի" կերպարը:
Փորձագետ Ջոննի Մելիքյանի կարծիքով, այսօր, սակայն, իրավիճակն աստիճանաբար փոփոխվում է: «2012թ.-ից՝ "Վրացական երազանքի" իշխանության գալուց ի վեր վառ արտահայտված հակառուսական արտահայտորթյունները Վրաստանի պաշտոնական անձանց շուրթերից գրեթե չի հնչել: Դրա փոխարեն, երկրի իշխանությունները հաճախ են խոսում քաղաքական և տնտեսական երկխոսության ամրապնդման մասին», - նշել է Մելիքյանը այսօր Երևանում VERELQ տեղեկատվական-վերլուծական կենտրոնի կազմակերպված կլոր սեղանի ընթացքում:
Փորձագետը նշել է, որ դեպի Մոսկվա որոշակի ուղղվածությունն այլ գործոններից բացի կարելի է բացատրել նաև ՆԱՏՕ-ից հիասթափությամբ: «Թբիլիսին երկար տարիներ ծեծել էր Հյուսիսատլանտյան դաշինքի դռները: Սակայն իր կազմ Վրաստան ընդգրկել Դաշինքը չի շտապում: Դրանում մենք կրկին անգամ համոզվում ենք ՆԱՏՕ-ի ԱԳՆ նախարարների հերթական հանդիպմանը: Չերնոգորիային առաջարկվել է սկսել բանակցությունները Դաշինքին անդամակցելու համար: Վրաստանին, սակայն, բացի ստանդարտ հաճոկախոսություններից, որևէ կոնկրետ առաջարկություն չի արվել»,-նշել է Մելիքյանը:
ՆԱՏՕ-ից հիասթափվելու, տարածաշրջանային սպառնալիքների ու մարտահրավերների ֆոնին ՌԴ-ը վրացական հասարակության ընկալման մեջ աստիճանաբար "օկուպանտ" երկրից վերածվում է կայուն "անվտանգության աղբյուրի": "Բազմաթիվ հարցումների արդյունքերը ցույց են տալիս, որ Վրաստանում Եվրասիական տնտեսական միությանը անդամակցելու կողմնակիցների թիվը անընդհատ աճում է և այս պահին կազմում է մոտ 30%, ինչը Վրաստանի պարագայում լուրջ ցուցանիշ է: ԵԱՏՄ-ի կողմանկիցների մի զգալի մասը Ռուսաստանը դիտարկում է նաև որպես անվտանգության աղբյուր", - հավելեց նա: