Мордовиянь Госсобраниянь Прявтось Ельникень буесэ содавтынзе социальной зярыя таркатнень. Сынст эйстэ васенцесь — Мокша леенть трокс сэдесь, кона вейсэнди Ельники веленть лия буетнень марто.
Ардомась тесэ виев, эрьва чи ардыть сядодо ламо покш сталмонь усксиця ардомапельть, мезесь кандсь зыян путепроводонтень. Сонзэ одкстомтоманть ней топавты Сарансто бригадась.
Буень прявтонть Юрий Бекешев ды компаниянь-подрядчикень тевень теицянть марто Владимир Чибиркин кортызе молиця тевтнень. Тешкстазель, седе тов эряви теемс сэдень покш вадрялгавтома. Те васняяк зыянтомочинь кевкстема. Ваннома ало истяжо ашти Краснослободск-Ельники трассань пельксэнь паролгавтомась. «Зыянтомо ды ардомань паро кить» раськень теварсевксэнть лувсо Ельникень ДСПМК-сь, конань прявтнэнь юткс сови Кузьма Самолькин Мордовиянь Госсобраниянь аграрной кевкстематнень, природопользованиянь ды стявтомань-теемань Комитетэнь прявтось, ютавты асфальтонь путоманть, ведень нолдамонь турбатнень полавтоманть, ялго ютамонь таркатнень тееманть.
Важодемань покш пельксэсь уш топавтозь ды пек паро ёнкс марто.
Истяжо нурька шкас, вейке ковс, Ельниксэ Курзёнковонь куросо путозь ки, кона тесэ зярдояк арасель. Кувалмозо — 600 метрат. Куронь эрицятне, малав весе од кудораськеть, пек учость кинть. 10,7 миллион целковойс теварсевксэсь топавтозь кочкицятнень кармавтомга. Мордовиянь Госсобраниянь депутаттнэнень истяжо пачтязель Уркат леенть трокс сэдень, кона чадыведень шкасто ваи ведь ало, кепетемадо ды виевгавтомадо энялдома. Владимир Чибиркин Юрий Бекешевень Ельникень буень появтонть марто содавтызе Урей веленть. Таркасо ютавтозь кортамо ды конструкциянь ваннома.
«Велесэ эрить малав 30 кудораськеть. Чадыведень шкась сынст туртов тееви покш стакачикс. Сэденть ютасомось чадыведень шкасто аволь зыянтомо. Секскак ней эряви муемс техникань лисема, анокстамс проект. Карматано явомо тенень мель, вешнеме тевень содыцят. Сэдень одкстомтомадо кевкстеманть эряви пекстамс, ломантненень эряви лезэнек», — ёвтась Мордовиянь Госсобраниянь Прявтось.