Ադրբեջանական կողմի ձեռնարկած դիվերսիոն ներթափանցման փորձն անմիջականորեն առնչվում է ԵԱՀԿ ՄԽ երկրների արտգործնախարարների վերջին հայտարարությանը: Դեկտեմբերի 4-ին ԱրմԻնֆո-ի թղթակցի հետ զրույցում այդ մասին հայտարարել է Արցախի նախագահի մամուլի քարտուղար Դավիթ Բաբայանը:
Նրա կարծիքով, միջնորդների հայտարարությունը կշռադատված էր և բովանդակում էր կարևոր ուղերձներ խաղաղ կարգավորմանն այլընտրանքի բացակայության վերաբերյալ: Բաբայանը կարծում է, որ դիվերսիոն ներթափանցման փորձը պատասխան է խաղաղության պահպանման և լարվածության մակարդակի նվազեցման կոչերին: Ընդ որում նա համոզմունք է հայտնել, որ դա թուրք-ադրբեջանական տանդեմի համատեղ դիրքորոշումն է: «Ադրբեջանը ցույց է տվել, որ նման վարքագիծը բնորոշ է մոլագար-ահաբեկչական երկրներին, որոնք սերտ կապեր են պահպանում ահաբեկիչների հետ և վաստակում ԻՊ հետ համագործակցությամբ», - ընդգծել է նա:
Ընդ որում Բաբայանը նշել է, որ այս օրերին Բաքվում են գտնվում թուրք պաշտոնյաներ և վարչապմետ Ահմեթ Դավութօղլուն, որը հայտարարել է «ադրբեջանական հողերը լիովին ազատագրելու» անհրաժեշտության մասին: Այդ ֆոնին մամուլի քարտուղարը չի բացառել, որ այդ դիվերսիան ձեռարկվել էր Անկարայի դրդմամբ, սակայն նա չի կարծում, թե դա ռուս-թուրքական հարաբերությունների սրման արդյունք է: «Դա ոտնձգություն է հայ ժողովրդի նկատմամբ, պետք չէ մոռանալ, որ հենց այդ երկիրն է իրագործել ցեղասպանություն», - ընդգծել է նա:
Ինչպես հաղորդվել է, դեկտեմբերի 4-ին ժամը 04:30-ի սահմաններում ղարաբաղա-ադրբեջանական հակամարտ զորքերի շփման գծի հյուսիսարևելյան (Թալիշ) ուղղությամբ հակառակորդը ձեռնարկել է հետախուզադիվերսիոն ներթափանցման հերթական փորձ: ԼՂՀ ՊԲ առաջապահ ստորաբաժանումները ժամանակին հավաստանշել են ադրբեջանական հատուկ ջոկատայինների առաջխաղացումը և կորուստներ պատճառելով` հետ շպրտել իրենց ելման դիրքերը: Ցավոք, ծավալված մարտերի ընթացքում մահացու հրազենային վիրավորում է ստացել ՊԲ զինծառայող, 1995թ. ծնված Էրիկ Էդիկի Գրիգորյանը: Դեպքի մանրամասները պարզելու համար կատարվում է քննություն:
Իսկ նախօրեին ԵԱՀԿ Մինսկի խմբի անդամ երկրների արտգործնախարարները
հանդես էին համատեղ հայտարարությամբ, որում, մասնավորապես, ասվում է. «Ընթացիկ տարում ղարաբաղա-ադրբեջանական զորքերի շփման գծում, ինչպես նաև հայ-ադրբեջանական սահմանին իրավիճակի սրման պատճառով ստատուս-քվոն տարածաշրջանում անկայուն է դարձել»: Միջնորդներն ափսոսանք են հայտնում շփման գծում և սահմանին ականանետերի և այլ ռազմական ծանր տեխնիկայի կիրառման առնչությամբ, ինչի հետևանքով խաղաղ բնակիչներ են զոհվել: Այս առնչությամբ նախարարներն ընդգծում են, որ ղարաբաղյան խնդիրը ռազմական լուծում չունի, ինչպես նաև չկա արդարացում քաղաքացիական բնակչության շրջանում զոհերին: ՙՄենք դիմում ենք հակամարտության կողմերին՝ կոչ անելով սեղմ ժամկետներում լարվածության թուլացմանն ուղղված միջոցներ ձեռնարկել՚,- ասվում է հայտարարության մեջ: Նախարարներն ընդգծում են, որ ԵԱՀԿ-ն արդեն կողմերին առաջարկել է հակամարտության գոտում լարվածության թուլացմանն ուղղված մեխանիզմներ, այդ թվում՝ սահմանային միջադեպերի հետաքննման համակարգի ներդնում: Այնուհետև միջնորդները ողջունում են Կարմիր խաչի միջազգային կոմիտեի հովանու ներքո գերիների փոխանակման գործում առաջընթացը՝ ողջունելով ԿԽՄԿ հետ այդ ուղղությամբ հետագա համագործակցությունը: ՙՀայաստանի և Ադրբեջանի միջև պետք է երկխոսություն հաստատվի նաև հարևան ժողովուրդների միջև վստահության մթնոլորտի ստեղծման շուրջ: Մենք ողջունում ենք Մինսկի միջնորդների հետ կողմերի համագործակցությունը՝ այդ նպատակին հասնելու նպատակով՚,- ասված է հայտարարության մեջ: Այնուհետև նախարարներն ընդգծում են,որ վերջին տարում ԵԱՀԿ ՄԽ-ին քննադատող հայտարարություններ են հնչում: ՙԱյս առնչությամբ ընդգծում ենք, որ ԵԱՀԿ ՄԽ-ն հակամարտության բոլոր կողմերի համար միակ ընդունելի ձևաչափն է, որը վայելում է ԵԱՀԿ անդամ բոլոր երկրների լիակատար վստահությունը: Միջնորդներին բանակցություններում հետընթացի մեջ մեղադրելու բոլոր հայտարարությունները խնդրի խաղաղ կարգավորման ճանապարհին հիմնական խոչընդոտները քողարկելու փորձեր են, որոնք հակամարտության խաղաղ կարգավորման հասնելու համար Հայաստանի և Ադրբեջանի իշխանությունների կողմից ոչ բավարար քաղաքական կամքի դրսևորում են՚,- ասված է հայտարարությունում: