მიხეილ სააკაშვილის თანაგუნდელები ყოფილი პრეზიდენტისთვის მოქალაქეობის შეწყვეტის გამო ხელისუფლებას აკრიტიკებენ. „პოლიტიკური გადაწყვეტილება“ და „სამარცხვინო საქციელი“ - ასე აფასებენ ნაციონალური მოძრაობაში დღეს პრეზიდენტ გიორგი მარგველაშვილის მიერ მიღებულ გადაწყვეტილებას.
„სრულიად ცხადია, რომ სამართლებრივი მექანიზმების გამოყენება ხდება პოლიტიკური ნიშნით. ამ გადაწყვეტილების მთავარი ამოცანა პოლიტიკურია - მიხეილ სააკაშვილის მაქსიმალური დისტანცირება პოლიტიკური ცხოვრებისაგან საქართველოში, განსაკუთრებით მოახლოებული არჩევნების ფონზე,“ - აცხადებს ნუგზარ წიკლაური.
გიორგი ბარამიძე მიღებულ გადაწყვეტილებას სამარცხვინოს უწოდებს და ამბობს, რომ ყველა ადამიანი ვინც მონაწილეობას იღებდა იმაში, რომ „პრეზიდენტ მიხეილ სააკაშვილს ქვეყნის მოქალაქეობა არ შეუნარჩუნდეს ძალიან სამარცხვინოდ მოიქცა და ასევე ყველა უწყება ვინც იღებდა ამ პროცესში მონაწილეობას ერთ ძალიან შავ და სამარცხვინო ფურცელს გადაშლის დღეს,“ - აცხადებს გიორგი ბარამიძე.
