მმართველი გუნდი სპორტის სამინისტროს დაფინანსების გაზრდას ითხოვს
მმართველი გუნდი სპორტის სამინისტროს დაფინანსების გაზრდას ითხოვს. განცხადება ამ საკითხზე დღეს პარლამენტში კომიტეტის სხდომაზე ბიუჯეტის განხილვისას გაკეთდა. დეპუტატები ითხოვენ ბიუჯეტის 144 მილიონ ლარამდე გაზრდას. ფინანასთა სამინისტროს მიერ შემუშავებულ ვარიანტში კი დაფინანსება მხოლოდ 105 მილიონს შეადგენს.
„მოთხოვნა იყო სპორტის სამინისტროს დაფინანსების 144 მილიონ ლარამდე გაზრდილიყო. თქვენ დაუმატეთ 15 მილიონი, ეს ნამდვილად არ არის საკმარისი იმისათვის, რომ აღნიშნულ ღონისძიებებს, რომელიც 2016 წელს არის დაგეგმილი ეს ბიუჯეტი ეყოს. თან ოლიმპიური წელია," - განაცხადა შოთა ხაბარელმა.
დეპუტატს ფინანსთა მინისტრის მოადგილემ გიორგი კაკაურიძემ უპასუხა და პირობა მისცა, რომ არც ერთი დაგეგმილ ღონისძიებას შეფერხება არ ექნება.
„წლის განმავლობაში თუ იმის საჭიროება დადგა, რომელ ფედერაციასაც ექნება კონკრეტულად პრობლემა იმ ფედერაციაზე მოხდება ადეკვატური თანხების გამოყოფა,“ - განაცხადა გიორგი კაკაურიძემ.
მომავალი წლის ბიუჯეტს საკომიტეტო მოსმენებზე უმრავლესობამ მხარი დაუჭირა, რაც იმას ნიშნავს რომ მთავარი საფინანსო დოკუმენტის განხილვა პლენარულ სხდომაზე გაგრძელდება.