ერთ-ერთი ყველაზე კრიტიკული პოზიცია მოწმის დაკითხვის ახალ წესთან დაკავშირებით სახალხო დამცვლის აპარატს აქვს.
კანონპროექტის ინიციატორებს და მმართველი გუნდის წევრებს შენიშვნების მოსმენა დღეს ადამიანის უფლებათა დაცვის კომიტეტის სხდომაზე მიუწიათ.
სამოქალაქო სექტორის წარმომადგენლები არ დაობენ, რომ მოწმის დაკითხვის მოქმედი წესი შესაცვლელია და საგამოძიებო უწყებას მასზე ზეწოლის შესაძლებლობა უნდა შეეზღუდოს, თუმცა წარმოდგენილი კანონპროექტი ამას ვერ უზრუნველყოფს.
ინიცირებული კანონპროექტის მიხედვით, მოწმეს უფლება ეძლევა უარი თქვას საგამოძიებო უწყებაში დაკითხვაზე, თუმცა გამომძიებელს შეუძლია მიმართოს სასამართლოს და მოითხოვოს მოწმის მაგისტრატი მოსამართლის თანდასწრებით დაკითხვა. ამ შემთხვევაში მოწმე ვალდებულია ჩვენება მისცეს. ამ ჩვენების შეცვლის უფლება კი არ ექნება.
არასამთავრობო ორგანიზაციების წარმომადგენლები აცხადებენ, რომ ეს ცვლილება მოწმეს ზეწოლისგან ვერ დაიცავს.
აღმასრულებელი ხელისუფლების წარმომადგენლები კი აცხადებენ, რომ შეთავაზებული ვერსია მოქმედს ჯობია და შესაბამისობაშია ევროსტანდარტებთანაც.
კანონპროექტს ოპოზიციის ნაწილი მხარს არ დაუჭერს, უმრავლეოსბა კი მოწმეთა დაკითხვის არსებული წესის ცვლილების აუცილებლობაზე საუბრობს.
ავტორები: ქეთი ნადიბაიძე.
