Мордовиясо Россиянь Президентэнть кармавтомга раськень теварсевкстнэнь топавтомадост. Мордовиянь виреньпаломань куншкакурос пачтязь од техника.
«Вирьтнень ванстома» региононь теварсевксэнь «Экология» раськень проектэнть лувсо Мордовияв пачтяви кирвазематнень мадстемань неень шкань техника.
Истя, Зубова-Полянань буень виреньпаломань куншкакурос рамазель чары лангсо эрьва кува ютавиця ардомапель. Ардомапелесь ардови стакасто ютавиця ды чеядавксонь таркатнева. Пек куроконь тевень лисемстэ эрьва кува ютавиця ардомапелесь бойкасто пачкоди кирвазематнень таркас. Ледстясынек, 2024-це иестэ вирьтнень ванстомас республикантень явозельть 15 миллиондо ламо целковойть. Неть ярмактне кучозельть виреньпаломань техникань ды комплексной мероприятиятнень ютавтомас оборудованиянь рамамос. Истяжо вирьтнень покшолмаст кастомга.
Вирень одкстомтомань вейкине тевенть топавты виреньпаломань куншкакурось: сонзэ лембе таркасонть кастовить пичень пекстазь ундокс марто 250 тёжат видьметь.
«Сёксня арсетяно путомс весе видьметнень Мордовиянь вирьтнесэ. Истяжо виреньпаломань куншкакуросо ушодсть кастомо панжадо ундокс марто пичеть. Сынь путозь алкуксонь компост марто модас, кона рамазь Ремондис региононь операторонть кедьстэ», — корты Адель Галиуллин Мордовиянь вирень, оциницянь хозяйствань ды природорользованиянь министрась. Виреньпаломань куншкакуросо кастыть декоративной касовксткак, истят кода туят, междевель, пихта, овтоумарькс ды кедра. Дачань ды кудотнень перька таркатнесэ сынст путомга рамамс мереви 2025-це иень тунда.
