Հայաստանի արտահանման ապահովագրական գործակալությունը (ՀԱԱԳ) ապահովագրել է «Մարան» ՍՊԸ-ի արտադրության գինու արտահանումը Ռուսաստանի Դաշնություն։
Ինչպես Banks.am-ին հայտնել են ՀԱԱԳ-ից, ապահովագրության պայմանագրով ՀՀ տարածքում գործող առեւտրային բանկերից մեկը հանդես է եկել որպես շահառու՝ դրա հիման վրա «Մարան»-ին տրամադրելով արտահանման ֆակտորինգ։
Ապահովագրությամբ ծածկվում է «Մարան»-ի գնորդ ընկերությանը մատակարարված ապրանքի դիմաց չվճարումը՝ պայմանավորված առեւտրային (անվճարունակություն, սնանկություն կամ առանց իրավական հիմնավորման վճարումից հրաժարում) եւ քաղաքական (վարչական որոշումներ, առեւտրի եւ միջազգային փոխանցումների սահմանափակումներ, բնական աղետներ եւ ֆորս-մաժոր) ռիսկերով։
ՀԱԱԳ-ի արտահանման ապահովագրության պայմանագրի ապահովվածությամբ «Մարան»-ը ստացել է նաեւ նախաարտահանման ֆինանսավորում՝ այն ուղղելով արտահանման պայմանագրով նախատեսված արտադրանքի պատրաստման համար ծախսերի կատարմանը։
«Հայաստանի արտահանման ապահովագրական գործակալություն» ԱՓԲԸ-ն հիմնադրվել է ՀՀ կառավարության որոշմամբ: Ընկերությունը տրամադրում է ապահովագրություն ՀՀ ռեզիդենտ արտահանող ընկերությունների կողմից մատակարարված ապրանքի դիմաց օտարերկրյա գնորդի կողմից չվճարման հետեւանքով կրած ֆինանսական վնասներից: Ընկերության միակ բաժնետերը ՀՀ-ն է: Ընկերության պաշտոնական կայքին կարող եք ծանոթանալ հետեւյալ հղումով:
