Сарансо ютасть кудораськень командатнень ютксо ГТО-нь фестивалень региононь эскельксэнь пелькстамотне. Изнямонть кис пелькстасть муниципальной кочкамонь эскельксэнь изницятне.
Кармавтоматнень ютксо – бассейнасо уема, стадионсо 30-нь ды 60-нь метрас дистанцият, таркасто кувалмос кирнявтомат, пневматической винтовкасто леднема ды ламо лия. Изнямонь 3-це тарканть саизе Кочкуровань буень Кочетковтнень командась. Кудораськень прявтось Дмитрий – диплом марто техник, низэ Светлана топавты Булгаковань велень поселениясо прявтонь тевтнень. Покш цёраст Андрей яви мель спортонь эрьва кодамо видтнэнень.
Омбоце тарканть изнизе Атюрьевань Аверясовтнень кудораськесь. Сергей Аверясов – МВД-нь важодиця, яви мель соксонь спортонтень. Низэ Елена – судонь пристав, яви мель шожда атлетикантень. 10-нь иесэ Илья цёраст налкси буень хоккеень командасо.
Республикань эскельксэнь изницякс теевсь Чернусь – Ширчковтнень Саранонь спортонь кудораськень командась. Кудораськес весе совицятне явить мель спортонтень. Теде башка, кудораськесткак чачсь сень кувалт, что зярдо-бути весе сынь явсть мель шожда атлетикантень вейке тренерэнь кедьсэ. Татьянань тетязо-авазо – Андрей ды Наталья Чернусьтне од порасто саезь явсть мель сэрьс кирнявтоматненень. Ды нейгак снартнить кирдемс форманть. Кудораськесь невтьссы Мордовиянть ГТО-нь весе Россиянь фестивальсэ, кона юты Томск ошсо умарьковонь 22-28-це читнестэ.
