Те иестэ юты Леонид Филатовонь лемсэ «Филатов Фест 2024» од поэзиянь весе Россиянь Х-це юбилеень фестивалесь. Пелькстамосо пелькстыть 18 иестэ саезь 35 иес рузонь кельсэ сёрмадыцят. Сыненст питне путы кемевикс жюрись, кона ашти содавикс литератортнэнь ды артисттнэнь эйстэ.
Саранонь «Крошка» налксицянь ды някань театрань налксицясь Алина Аверьянова ютызе онлайн-кочкамонть, пек парсте ловнынзе эсензэ валморотнень нилеце пельксэнь очной эскелькссэ Есенин-куншкакуросо ды лиссь фестивалень полуфиналс.
Алина Аверьяновань чачома ёнксось – республикань Кочкурбуень Вирь ало Тавлась. Ютазь иестэ тейтересь прядызе Н.П. Огарёвонь лемсэ МГУ-нь раськень культурань институтонь налксицянь куронть. Фестивалень полуфиналтнэ ютыть те иень медьковсто, а покш финалонть арсеви ютавтомс ожоковсто. Изницясь муеви жюринть пельде питнень цётамотнень вейс путоманть коряс. «Приз зрительских симпатий» лемень кирдицянть вайгелень максомань коряс кочкасызь ваныцятне.
