ՀՀ Կենտրոնական բանկը հրապարակել է «ՀՀ եւ ԼՂՀ տարածքներում գործող առեւտրային բանկերի եւ վարկային կազմակերպությունների վարկային ներդրումների եւ ներգրավված միջոցների կազմն ու կառուցվածքն ըստ մարզերի» վերլուծությունը:
Ինչպես հաղորդում են ՀՀ ԿԲ մամուլի ծառայությունից, 2014թ. հունիսից մինչեւ 2015թ. հունիսն ընկած ժամանակահատվածում ՀՀ մարզերում եւ ԼՂՀ-ում վարկերի ընդհանուր աճի տեմպը գերազանցել է Երեւանում վարկերի աճի տեմպը. վարկային ներդրումները Երեւանում աճել են 6.3%-ով (77.8 մլրդ դրամով), իսկ ՀՀ մյուս մարզերում եւ ԼՂՀ-ում միասին՝ 14.3%-ով (89.9 մլրդ դրամով):
ՀՀ մարզերում եւ ԼՂՀ-ում հիմնականում աճել են արդյունաբերության եւ գյուղատնտեսության ճյուղերին տրամադրված վարկերը: Հաշվետու տարվա ընթացքում 1.6 տոկոսային կետով նվազել է վարկային ներդրումների կենտրոնացվածությունը Երեւանում եւ կազմել 64.8%: Ավելացել է միջազգային վարկային ծրագրերով տրամադրված վարկերի կշիռը ընդհանուր վարկերում՝ կազմելով 14.2%:
Գրեթե բոլոր մարզերում եւ ԼՂՀ-ում աճել են տարածքային հասանելության ցուցանիշները՝ 1 շնչին եւ 1 մասնաճյուղին բաժին ընկնող ավանդների եւ վարկերի ծավալները:
