ԱԿԲԱ-ԿՐԵԴԻՏ ԱԳՐԻԿՈԼ Բանկը հերթական անգամ հանդես է գալիս Հայաստանում Ֆրանսիական համալսարանի (ՀՖՀՀ) 2014-2015 ուսումնական տարվա շրջանավարտների դիպլոմների հանձնման հանդիսավոր արարողության հովանավոր, որը տեղի կունենա դեկտեմբերի 4-ին, ժամը 18:00-ին, Առնո Բաբաջանյան համերգասրահում: Միջոցառման ընթացքում կտրամադրվեն նաև Հայկական Բարեգործական Ընդհանուր Միության գերազանցության կրթաթոշակներ համալսարանի 24 ուսանողներին: ՀԲԸՄ-ն ամեն տարի գերազանցության կրթաթոշակներ է շնորհում համալսարանի լավագույն ուսանողներին:
Ինչպես ԱրմԻնֆո գործակալությանը տեղեկացվել է ՀՖՀՀ մամուլի ծառայությունից, ԱԿԲԱ-ԿՐԵԴԻՏ ԱԳՐԻԿՈԼ Բանկն արդեն երկար տարիներ համագործակցում է համալսարանի հետ` կադրերի պատրաստման գործում: Բանկը նաև «Բանկային գործ և ապահովագրություն» մասնագիտացմամբ բակալավրիատի բացառիկ հովանավորն է: Ամեն տարի բանկում իրենց արտադրական պրակտիկան են անցնում համալսարանի բազմաթիվ ուսանողներ, իսկ մասնագիտական բարձր ունակություններ ցուցաբերած շատ շրջանավարտներ արդեն համալրել են բանկի աշխատակիցների շարքերը:
Միջոցառմանը հրավիրված են Հայաստանում ֆրանսիական համալսարանի Հոգաբարձուների խորհրդի նախագահ Արթուր Բաղդասարյանը, ՀՀ ԿԳ նախարար Արմեն Աշոտյանը, Հայաստանում Ֆրանսիայի արտակարգ և լիազոր դեսպան Ժան-Ֆրանսուա Շարպանտիեն, Ժան Մուլեն Լիոն 3 համալսարանի նախագահ Ժակ Կոմբին, ԱԿԲԱ-ԿՐԵԴԻՏ ԱԳՐԻԿՈԼ բանկի գլխավոր գործադիր տնօրեն Հակոբ Անդրեասյանը, Հայկական Բարեգործական Ընդհանուր Միության Հայաստանի տնօրենի պաշտոնակատար Հովիկ Եորդեկյանը, պաշտոնատար այրեր, դիվանագիտական ներկայացուցիչներ, ձեռնարկության ղեկավարներ, շրջանավարտներ, ուսանողներ և ծնողներ:
Առ այսօր համալսարանն ունի ավելի քան 1500 շրջանավարտ, որոնցից ավելի քան 70%-ն աշխատում է Հայաստանում իրենց մասնագիտությանը համարժեք և միայն 6-7%-ն է սովորում կամ աշխատում արտասահմանում: Հայաստանում ֆրանսիական համալսարանը միջպետական բուհ է` հիմնադրված Հայաստանի և Ֆրանսիայի կառավարությունների կողմից: ՀՖՀՀ-ն միաժամանակ շնորհում է հայկական և ֆրանսիական Licence/Բակալավրի և Master/Մագիստրոսի պետական դիպլոմներ:
Հիշեցնենք, որ Հայկական Բարեգործական Ընդհանուր Միություն (ՀԲԸՄ) անգլերեն՝ Armenian General Benevolent Union, AGBU), հայկական բարեգործական կազմակերպություն է, որն աշխարհի ամենախոշոր հայկական հասարակական կազմակերպությունն է։ Այժմ նրա գլխամասը գտնվում է Նյու-Յորքում, տարեկան միջազգային բյուջեն կազմում է մոտ 36 միլիոն ԱՄՆ դոլար։ ՀԲԸՄ-ն պահպանում և զարգացնում է Հայկական ազգային գիտակցությունը և ժառանգությունը զանազան կրթական, մշակութային և մարդասիրական ծրագրերի միջոցով։ Այն հիմնադրվել է 1906 թվականի ապրիլի 15-ին, Կահիրեում՝ հայտնի ազգային գործիչ Պողոս Նուբարի և եգիպտահայ համայնքի ականավոր ներկայացուցիչների նախաձեռնությամբ՝ հայ ժողովրդի հոգևոր և մշակութային զարգացմանը նպաստելու համար։ Կազմակերպությունը պահպանում և քարոզում է հայկական ինքնությունը և մշակութային ժառանգությունը, կրթական, մշակութային և մարդասիրական ծրագրերի միջոցով, ամեն տարի միավորելով մոտ 400 հազար հայերի, 35 երկրներից: ներկայումս կազմակերպությունն ունի իր բաժանմունքները 22 երկրների 80 քաղաքներում, իր 22 հազար անդամներով, 120 բաժանմունքներով և 27 մշակութային կենտրոններով, որոնք տեղակայված են ԱՄՆ-ում, Եվրոպայում, մերձավոր Արևելքում, Հարավային Ամերիկայում և Ավստրալիայում: ՀԲԸՄ-ն ունի 20 դպրոց (6600 աշակերտ), երկու գրադարան, որից մեկը գտնվում է Փարիզում, իսկ մյուսը` Նյու-Յորքում:
Հիշեցնենք, որ ԱԿԲԱ-ԿՐԵԴԻՏ ԱԳՐԻԿՈԼ Բանկը Հայաստանում գործում է 1995 թվականից: 2006 թվականից բանկի մեծամասնական բաժնետերն է եվրոպական խոշորագույն Credit Agricole S.A. բանկային խումբը, 15.56% բաժնեմասով, որին հաջորդում է SJSC «Sacam Internationalե-ը (Credit Agricole S.A. խմբի անդամ)` 12.44%: Բանկի կապիտալին մասնակցում են նաև Գյուղացիական փոխօգնության 10 մարզային միություններ: Մասնաճյուղրի ցանցով բանկը երկրորդն է Հայաստանում: Իր հիմնական հաշվեկշռայիին ցուցանիշներով ԱԿԲԱ-ԿՐԵԴԻՏ ԱԳՐԻԿՈԼ Բանկը գտնվում է Հայաստանի առաջատար բանկերի հնգյակում:-