ԱԳՆ․ Հայկական պատվիրակությունը ՅՈւՆԵՍԿՕ-ում բացահայտեց ադրբեջանական կեղծիքները
Հաղորդագրության համաձայն՝ հայկական կողմի ելույթը վերաբերում էր մասնավորապես Ադրբեջանի մշակույթի և զբոսաշրջության նախարարության ու այդ երկրում գործող լրատվամիջոցների կողմից տարածված տեղեկատվությանը, «որտեղ մի շարք կեղծիքներ ներկայացվում են ՅՈւՆԵՍԿՕ-ի և մասնավորապես վերջինիս Ոչ նյութական մշակութային ժառանգության պահպանման միջկառավարական կոմիտեի անունից»: «Այդ կեղծիքների թվում են Քոչարի պարի հայկական ինքնության իբրև թե ՅՈւՆԵՍԿՕ-ի կողմից մերժումը, կոմիտեի նիստի ընթացքում ադրբեջանական պատվիրակության տեղի չունեցած ելույթները, ՅՈւՆԵՍԿՕ-ի գործառույթներին որևէ կերպ չառնչվող քաղաքական բնույթի զեկույցների ընդունումը և այլն», - նշում է Հայաստանի արտաքին քաղաքական գերատեսչությունը:
«Նշվեց նաև, որ եթե Ադրբեջանը կարող է կեղծիքներ տարածել իր երկրում` մոլորության մեջ դնելով իր իսկ բնակչությանը, ապա համաշխարհային հանրության և միջազգային կազմակերպությունների հետ նույն կերպ վարվելն անհնար է», - ասված է հաղորդագրությունում:
Հայկական պատվիրակության ներկայացուցիչը ևս մեկ անգամ բոլորի ուշադրությունն է հրավիրել այն հանգամանքի վրա, որ Ադրբեջանն ամեն կերպ փորձում է քաղաքականացնել ՅՈւՆԵՍԿՕ-ի հարթակը, ինչն անթույլատրելի է: ՅՈւՆԵՍԿՕ-ի քարտուղարությանը կոչ է արվել հետամուտ լինել և արձագանքել Ադրբեջանի կողմից կազմակերպության անվան շահարկումներին և կեղծիքների տարածմանը, ինչը ոտնահարում է կազմակերպության հեղինակությունը: