Ազատության հրապարակում մեկնարկել է սահմանադրական հանրաքվեի անցկացման դեմ ՙՆոր Հայաստան՚ հանրային փրկության ճակատի հանրահավաքը: Հանրահավաքի մասնակիցները դժգոհում են երկրի ղեկավարության քաղաքականությունից և իշխանության տապալման կոչ անում:
Ճակատի քաղխորհրդի անդամ Արմեն Մարտիրոսյանը քաղաքացիներին կոչ է արել ակտիվորեն մասնակցել ՙՈչ՚-ի շտաբի մասնակցությամբ վաղը կայանալիք հանրահավաքին: ՙՆրանք, ովքեր գտնում են, որ ընդդիմությունը միասնական չէ, վաղը կհամոզվեն հակառակում՚, հայտարարել է նա:
Մարտիրոսյանն անդրադարձել է նաև նախօրեին ոստիկանության մասնակցությամբ միջադեպերին: ՙՎստահ եմ, որ նրանք մեր կողմը կանցնեն: Հոգով նրանք արդեն մեզ հետ են՚,- հայտարարել է նա:
Իր շուրջօրյա ակցիաները ՙՆոր Հայաստանը՚ սկսել է դեկտեմբերի 1-ին Ազատության հրապարակում: Նույն օրը բերման էին ենթարկվել ընդդիմադիր Գևորգ Սաֆարյանը և հանրահավաքի ևս երկու մասնակից:
Բացի այդ, ՙՆոր Հայաստանի՚ ակտիվիստների և ոստիկանների միջև ընդհարումներ են տեղի ունեցել: Պատճառը ՀՀԿ գրասենյակի մոտ ծաղիկներ դնելու ակտիվիստների փորձն էր, սակայն ոստիկանությունը թույլ չի տվել նրանց մոտենալ շենքին:
