ნატო-ს კომუნიკეს გამოქვეყნებიდან რამდენიმე საათში საგანგებო განცხადება თავდაცვის მინისტრმა ბაქოდან გააკეთა. თინა ხიდაშელის განმარტებით, ნატო-ს გადაწყვეტილება - მონტენეგროსთან წევრობისთვის მოლაპარაკებები დაიწყოს, საქართველოს ალიანსში გაწევრიანებისთვის ღია გზავნილია.
ნატო-ს მინისტერიალზე მიღებული გადაწყვეტილების შემდეგ საგარეო საქმეთა სამინისტრომ განცხადება გაავრცელა, სადაც საუბარია, რომ საქართველოს ნატო-ს წევრობისთვის ყველა მექანიზმი უკვე აქვს.
ნაციონალური მოძრაობა კი ხელისუფლებას მოკავშირეებთან არასაკმარისი მუშაობის გამო აკრიტიკებს. ოპოზიცია მთავრობისაგან ნატო-ს კომუნიკეში მითითებულ ვალდებულებების შესრულებასაც ითხოვს, რომელიც ქვეყანაში მედიის თავისუფლების დაცვასა და სასამართლოს დამოუკიდებლობას გულისხმობს.
მმართველი კოალიციის მიმართ კრიტიკული იყო დღეს ნინო ბურჯანაძე. ნატო-ში გაწევრიანების პროცესებზე, გაერთიანებული დემოკრატების თავმჯომარემ მთავრობა არასწორი მოლოდინის შექმნაში დაადანაშაულა.
ნატო-ს მთავარი გზავნილების შინაარსი დღეს ექსპერტებმაც განმარტეს. მათი განცხადებით, ალიანსმა ღიად თქვა, რომ საქართველოს ნატო-ში გაწევრიანებამდე წევრობის სამოქმედო გეგმის ეტაპის გავლა მოუწევს.
ავტორები: ნინო სამყურაშვილი, ელენე ფირცხალაიშვილი, თაკო სურგულაძე, მარიამ შანშიაშვილი.
