„კომუნიკე ღია კარის პოლიტიკას ეძღვნება,"-ეკა ტყეშელაშვილი
ნატო-ს მინისტერიალის კომუნიკე საქართველოს სტრატეგიული კვლევების ინსტიტუტის პრეზიდენტმა შეაფასა, ამის შესახებ ეკა ტყეშელაშვილმა რუსთავი 2-ის პირდაპირ ეთერში ისაუბრა.
ეკა ტყეშელაშვილმა განაცხადა, რომ ნატო-ს გადაწყვეტილება მონტენეგროსთან დაკავშირებით, ღია კარის პოლიტიკისთვის მნიშვნელოვანია.
„საქართველო ალიანსის წევრი ქვეყანა იქნება, ამავდროულად, კონკრეტული მინიშნებებია, რომ საქართველოს ინსტრუმენტების სახით აქვს ყველა შესაძლებლობა, რომ მიუახლოვდეს ნატო-ში გაწევრიანების მიმართებაში კრიტერიუმების საზღვარს, ამავე დროს ქართულ ხელისუფლებას უმახვილებს ყურადღებას, რომ ნატო მხოლოდ სამხედრო ალიანსი არ არის და ქვეყნის მდგრადობა მხოლოდ თავდაცვითი სისტემების არსებობით არ გამოიხატება, არამედ დემოკრატიული ინსტიტუტების მდგრადობაში. ის ასპექტები, რაც კომუნიკეში მოხვდა, მედიათავისუფლებისა და კანონის უზენაესობის თვალსაზრისით, მნიშვნელოვანი პოლიტიკური სიგნალია,“-განაცხადა ტყეშელაშვილმა.
ეკა ტყეშელაშვილმა მაპ-ის მინიჭებაზეც ისაუბრა და განაცხადა, რომ როდესაც ქვეყნისთვის პოლიტიკური სიმწიფის მომენტი დადგება მაპ-ის მინიჭებასთან დაკავშირებით, ეს მცირეხნიანი პერიოდი იქნება ალიანსში გაწევრიანებამდე, ამიტომ მისივე თქმით, მნიშვნელოვანია, რომ საქართველომ დემოკრატიული ღირებულებების თვალსაზრისით არასწორი ნაბიჯები არ გადადგას და შესაძლებლობები გონივრულად გამოიყენოს.