Чадыковонь 26-це чистэ эрзянь ды мокшонь раськень культурань музейсэ панжови «Меельце тешкс» Тавлань мастерэнь вейсэндявксос совицятнень важодемань невтема. Алтави сон общественной вейсэндявксонь 25 иетненень. Экспозициясонть невтевить 100 ламо сех вадря важодемат. Те скульптурань композицият, эйкакшонь таркасо а аштиця налкшкеть, эрьва кодамо чачонь салдыркст, паргинеть, коень ютавтомань чамакст, карандашонь кирдемапельть, керсезь лишметь ды истя седе тов.
Тавлань налкшкесь содави ломанень рунгонь пропорциятнень эсензэ коень тееманть кувалт. Важодемань сюжеттнэ чачить велень эрямосто: урьвакстомасто, тундонь ильтямосто ды ламо лиясто. Ней Тавлань мастертнэнь «Эрьмезь» Вейсэндявксось вейсэнди малав 20 шкинев керсицят, Мордовиянь заслуженной артыцянть, Россиянь артыцянь Вейсэндявксос совицянть Пётр Рябовонь прявтсо. Сынст весень сюлми вейсэнь тевентень вечкемась. Вейсэндявксонь прявт тевесь – раськень культурань этнической ды духовной койтнень ванстомась. Пек ламо дипломтнэнь ды грамотатнень, республикань, весе Россиянь ды раськеютконь невтематнесэ ды фестивальтнесэ улемась, финнэнь-угрань эрьва кодат семинартнэс, скульптурань пленэртнес, симпозиумтнес тердемась, конат сравтовить ды пурныть вийть масторонь келес, корты седе, што керсицятнень Вейсэндявксонь шкинемантень явови покш мель.
