Мордовиясо «Жилье и городская среда» раськень теварсевксэнь «Формирование комфортной городской среды» федеральной проектэнть лувсо паролгавтовить вейсэнь таркатне. Истя, Лямбирьсэ ушодсть Славань Аллеянь одкстомтоманть ды Ленинэнь куросо парконь таркань стявтоманть. Славань Аллеясонть уш важоди техника. Стявтыцятне таргизь ташто брусчатканть, сонзэ таркас маласо шкасто путыть од. Ве шкасто юты парконь таркань вадрялгавтомась. Велень куншкасо маласо шкасто тееви эйкакшонь налксемань комплекс ды эзем марто оймсемань тарка. Тесэ жо путсызь Лямбирень тешксэнь-лишмень архитектурань вишка форманть. Куншкакуронь куншкасо истяжо ютыть урядамонь важодематне, ускозь човарось ды тапсезь кевтне.
