2VtzqvFiGAP
Норуот маастардарын уонна уран тарбахтаахтарын өйүүр инниттэн 2012 сылтан өрөспүүбүлүкэҕэ Норуот маастарын күнэ бэлиэтэнэр.
«Айар» кыһа ураты болҕомто ууран, талааннаах, өбүгэбит мындыр толкуйун илдьэ сылдьар дьон билиилэрин, сатабылларын үйэтитэн, «Иис-уус алыба» сиэрийэнэн кинигэлэри таһаарар. Ол курдук, атыыга билигин баар кинигэлэрбитин билиһиннэрэбит:
— Татьяна Карамзина «Туос иһити тигии». Бу кинигэҕэ ааптар, Саха Өрөспүүбүлүкэтин уус-уран оҥоһуктарын маастара, өбүгэлэрбит үтүө үгэстэрин, төрүт дьарыктарын сөргүтэр, сайыннарар, салгыыр сыалтан туос иһити өбүгэ төрүт ньымаларынан тигии кистэлэҥнэрин кытта билиһиннэрэр, сүбэ-ама биэрэр. Туоһунан дьарыктаныан баҕалаах дьоҥҥо, эдэр ыччакка анаан иистэнии бэрээдэгэ утумнаахтык ыйыллар.
— Марианна Степанова «Соннор, кэһиэччиктэр, сэлиэччиктэр». Ааптар араас быһыылаах-таһаалаах, тупсаҕай киэргэллээх соннор, кэһиэччиктэр, сэлиэччиктэр тигиилэрин хаамыытын, ньэмиэттэрин, киэптэрин уонна тэттик сүбэлэри биэрэр. Холобура, хабахтан хаппар оҥорорго маннык сүбэни биэрэр: сууйуллубут, имиллибит хабах сыта суох, сымнаҕас буолар. Имиллибит хабаҕы харайан ууруу болҕомтону ирдиир. Онон куура хаппатын курдук сиидэс таҥаска суулаан сөрүүн сиргэ харайабыт. Таҥас үөнүттэн харыстаан хаһыакка суулуохха сөп.
— Туяра Александрова «Түүлээххэ сууланан». Ааптар бу кинигэҕэ эргэ саҕынньахтары уларытан араас саҥа таҥастары тикпит уопутуттан үллэстэр, тигиилэрин хаамыытын, ньэмиэттэрин биэрэр уонна бэйэтэ оҥорбут оһуордара киирдилэр.
— Уран Хатын «Өбүгэ таҥаһа бэлиэлэр, ымыылар». Кинигэҕэ Саха сирин, Арассыыйа уонна тас дойдулар түмэллэригэр харалла сытар, ону сэргэ биирдиилээн чааһынай дьон коллекциятыгар баар экспонаттарга олоҕуран, өбүгэлэрбит ХVII—XIX үйэҕэ кэтэ сылдьыбыт таҥастарын-саптарын итэҕэлгэ ситимнээх бэлиэлэрин, киэргэллэрин, ымыыларын суолтатын туһунан сиһилии суруллар.
Уратытык таҥнаргын сөбүлүүгүн? Этничэскэй истиил тута харахха быраҕыллар, ону сэргэ норуот төрдүн-ууһун кытта ситимниир буолан, ханна баҕарар өрүү дьон кэрэхсэбилин ылар. Александра Гаврильева «Өбүгэ таҥаһын саҥалыы» кинигэтигэр аныгы муода ирдэбиллэригэр сөп түбэһиннэрэн сахалыы тыыннаах таҥас, суумка тигиитин, киэргэл оҥоһуутун хаамыылара киирдилэр. Ону таһынан, иис-уус кэрэ эйгэтигэр уһуйааччыларга, муода, тыйаатыр устуудьуйатын салайааччыларыгар, ийэлэргэ көмө буоллун диэн сценическэй таҥас оҥоһуута бэриллэр.
Кулун тутар 9 күнүгэр диэри «Айар» бары маҕаһыыннарыттан 1500 сууматтан үөһэ атыыластаххытына «Өбүгэ таҥаһа бэлиэлэр, ымыылар», «Вязание в национальном стиле» уо.д.а кинигэлэри бэлэх ылыаххытын сөп.
Туһалаах кинигэлэри бэлэх уунуҥ, тускутугар туһаныҥ!
Сообщение Норуот маастардарын кинигэлэрэ появились сначала на Сетевое издание SAKHALIFE.RU.
