Брендбукпа логотип конкурсĕ

Чӑваш Республикин вӗренӳпе ҫамрӑксен политикин министерстви чăваш халăхне çутта кăларакан аслă педагог,ăсчах Иван Яковлевич Яковлев ҫуралнӑранпа 175 ҫул ҫитнĕ май логотиппа брендбуксен конкурсне ирттерет. Унта хальллĕхе 2 çын хутшăннă. Пĕтĕмлетÿ тăвиччен тата ĕçсем кĕтеççĕ.

Логотиппа брендбуксен конкурсне кирек камăн та хутшăнма ирĕк пур. Пĕр çын пурĕ 3 ĕç тăратма пултарать. Конкурс йĕркипе тĕплĕнрех Чăваш Республикин вӗренӳпе ҫамрӑксен политикин министерствин сайтĕнче паллашма пулать.

ИРИНА ДАНИЛОВА: "Акан 25-мĕшĕнче Иван Яковлевич Яковлев çуралнăранпа 175 çул çитет. Çак куна хатĕрленсе эпир Ульяновск облаçĕнче тухса тăракан "Канаш" ятлă пĕртен-пĕр чăваш хаçатĕнче ĕçлекенсем вулакансене Яковлев пурнăçĕпе паллаштаратпăр. Кашни номерте пĕрер старница информаци, сăвăсем пичетлетпĕр. Нумаях пулмасть интернетра Яковлев çуралнă кунĕ тĕлне логотип конкурс пуласса вуласа пĕлтĕм. Манăн та хутшăнса пăхас кăмăл çуралчĕ. Ĕçрен киле кайнă май çул çинче вăл мĕнлерех пуласси пирки шутласа пытăм, компьютер умне ларсассăн вара логотип хăйне хăех çуралчĕ. Чи кирли – Яковлев хушамачĕпе вăл çуралнă çула çыхăнтарасси пулчĕ. Унтан чăвашсем юратнă тĕсĕсене хушса хутăм, çавăн пек логотип çуралчĕ. Конкурса хутшăнакансене ăнăçу сунатăп. Хам çĕнтерессе шанатăп".

 Çĕнтерÿçĕне 90 000 тенкĕ парса хавхалантарĕç. Конкурс материалӗсене пуш уйӑхӗн 15-мӗшӗнчен пуҫласа пуш уйӑхăн 25-мӗшӗччен Шупашкар хулинчи Президент бульварӗн 17-мĕш çуртĕнче, 6-мĕш хутра йышăнаççĕ.