Ucom-ն այսօր հայտնել է, որ ընկերության նոր գլխավոր տնօրեն է նշանակվել Ռալֆ Յիրիկյանը:
Ռալֆ Յիրիկյանը 2022 թվականի հունիսին թողել էր Վիվա-ՄՏՍ ընկերության գլխավոր տնօրենի պաշտոնը:
Վիվա-ՄՏՍ-ի հաղորդագրության մեջ ասված էր.
«ՄՏՍ Հայաստան» ընկերության նախկին գլխավոր տնօրեն Ռալֆ Յիրիկյանը, ով ընկերությունը գլխավորել է 2004 թվականին այն հիմնադրելու պահից ի վեր եւ որի ղեկավարությամբ Վիվա-ՄՏՍ-ը դարձել է Հայաստանում հեռահաղորդակցության ոլորտի անվիճելի առաջատար, լքում է ընկերությունը՝ գործարար այլ նախագծերով զբաղվելու համար»:
«Տնօրենների խորհրդի անունից խորին շնորհակալություն եմ հայտնում Արա Խաչատրյանին՝ «Յուքոմ»-ի համար օրինակելի առաջնորդ լինելու համար: Պաշտոնավարման ընթացքում նա կարողացավ «Յուքոմ»-ը դարձնել ավելի լավը՝ բարելավելով հաճախորդներին մատուցվող ծառայությունների որակը եւ բարձրացնելով ընկերության գործառնական արդյունավետությունը»,- ասել է Ucom տնօրենների խորհրդի նախագահ Գուրգեն Խաչատրյանը։
Արա Խաչատրյանը գլխավոր տնօրենի պաշտոնն ստանձնել էր 2020 թվականի ապրիլից:
«Ինձ համար մեծագույն պատիվ եւ պատասխանատվություն էր ծառայել մարդկանց, բաժանորդներին եւ Ucom-ի թիմին որպես գլխավոր տնօրեն։ Մենք միասին մուտք գործեցինք աննախադեպ աճի դարաշրջան՝ միաժամանակ հավատարիմ մնալով մեր հիմնական, մարդակենտրոն արժեքներին ու առաքելությանը: Հպարտ եմ, որ աշխատել եմ «Յուքոմ»-ի մարդկանց հետ, որոնք ցուցաբերել են մեծ նվիրվածություն՝ օգնելով առաջ տանել ընկերությունը վերափոխման ընթացքում»,- ասել է Արա Խաչատրյանը։
«Վստահ ենք, որ Ռալֆ Յիրիկյանի կողմից «Յուքոմ»-ի առաջնորդության ստանձնումը պատմական ու նշանակալի իրադարձություն է ընկերության համար: Ռալֆ Յիրիկյանը ոգեշնչող, աշխատասեր եւ վճռական առաջնորդ է, որը գիտի՝ ինչպես բացահայտել եւ խթանել աճը: Ավելին՝ Ռալֆը մարդկային անփոխարինելի եւ կառավարչական բարձր որակներ ունեցող անհատականություն է, որը կարողանում է հեշտությամբ եւ արագորեն հաղորդակցվել թիմի անդամների հետ։ Տնօրենների խորհուրդը մեծապես վստահում է Ռալֆ Յիրիկյանի փորձին ու ինստիտուցիոնալ գիտելիքին` երկարաժամկետ հեռանկարում «Յուքոմ»-ի շարունակական առաջընթացն ապահովելու եւ շուկայում առաջատարի դիրքը պահպանելու համար», - ասել է Տնօրենների խորհրդի նախագահ Գուրգեն Խաչատրյանը:
