Муй эӆты катра порайн сакат верыӆысайт. Щит эӆты каматса ясаң ястас Галина Ивановна Трибус. Ӆув Октябрьский районан уӆты Шаншвош (Шеркалы) куртан уӆ. – Там йисан ӆапкаятан турамсот сак тэӆые. Муй хорпи от самена рахаӆ, щит ӆутӆан. Турамсот саклопсат, хорамаң хошапиет, палщамщакат каратӆан. Катра порайн па сорт хуӆ шанш ӆов эӆты верыӆыса. Ун сорт хуӆ вуӆа, каварӆа. Шанш ӆоваӆ атэӆ вуӆа, яӆпа па каварӆа. Ямас кавартаӆ юпийн кашаң ӆоваӆ атэӆ нох вуӆа, сыстампӆа. Нэмоӆты хуӆ шук щита ант ат хащас. Ямас сыстамптам, сораӆтам юпийн кутапан ун йинтапан вусые верӆа. Па ямашак сораӆӆа. Ин там йисан оляптаӆайт, питыя ант йиты ураңан. Катра хоты щиты картыӆысайт. – Хой эӆты наң щи вер вантсан, хойн алиӆысайн? – Щимащ сакат ма аңкем верыӆыйс. Ма ин ищи няврэмата там вер альӆам. ӆувиӆаӆа шеңк умащ. ӆапкаятан ӆутты сакат пиӆан каратӆэӆ. Пиӆнэңӆаӆа, аңкиӆаӆа мойӆаӆӆаӆ. – Щи тумпийн моӆты эӆты сакат па верыӆыӆты? – Сак хоты турамсот пормас эӆты верты рахаӆ. Туп кум мосаӆ, ӆаңхаты мосаӆ. Тонты шукат яха аяптаман ищи хорамаң сакат верты рахаӆ. Там йисан хонна турамсот юх эӆты нёхрам сак сэмиет верӆайт, ӆапкаятан тыныӆайт. Щит ищи ям. Кашң хоят турмев, мувев, йиңкев хоща ванашак уӆты ӆаңхаӆ. Щишан щимащ сакат ӆутӆат, мушӆаӆ яммаӆӆат. Па муй атом? Кашң пормас ӆув хорам тайӆ. Муң ханты нэңӆув кашң пормас эӆты хорам верты верытӆат. Ай уӆмем порайн ун аңкем хоща вантыӆысам: палщамщакаӆа хотаң пун шук тахартыйс. Муңева умащ, ӆувеӆа хорам.
