Սեբուհ Տեր-Կյուրեղյանը ծնվել է Սան Ֆրանցիսկոյում, սովորել Բերքլիի, այնուհետեւ Կալիֆոռնիայի համալսարաններում, աշխատել Amazon Web Services-ի Արհեստական բանականության (AI) խմբում որպես պրոդուկտ մենեջեր:
Ընկերների հետ ստեղծել է LottoShield սեփական ստարտափը ու զարգացնում է այն ԱՄՆ շուկայում: LottoShield-ը վիճակախաղերի գույքագրումը հետեւելու եւ կառավարելու ավտոմատացված համակարգ է՝ նախատեսված առեւտրի կենտրոնների, խանութների համար, որոնք զբաղվում են վիճակախաղերի վաճառքով: Այն ավտոմատ համադրում է գույքագրման քանակը, վաճառքի տվյալները եւ պետական վիճակախաղի հաշիվ-ապրանքագրերը՝ ընդգծելով խնդիրները:
Սեբուհն iTel.am-ին պատմել է տեխնոլոգիաներով հետաքրքրվելու, մեծ ընկերությունում աշխատելու, ստարտափ գաղափարի իրականացման ու զարգացման ծրագրերի մասին:
ՏՏ-ն ու Amazon Web Services-ում աշխատանքը
Ծնվել ու մեծացել եմ Սան Ֆրանցիսկոյում: Հայրս Հայաստանի ամերիկյան համալսարանի հիմնադիրներից է՝ Արմեն Տեր-Կյուրեղյանը: Դեռ փոքրուց Հայաստանի հետ կապը եղել է։ Լոս Անջելեսում սովորել եմ հայկական դպրոցում, հայկական միջավայրում եմ մեծացել։
Արդյունաբերական ճարտարագիտություն եւ գործառնական հետազոտություն մասնագիտացմամբ սովորել եմ Բերքլիի համալսարանում, ուսումնասիրում էի գործարանների արտադրական կառավարում։ Ուզում էի ֆինանսների ուղղությամբ գնալ, բայց չստացվեց, քանի որ համալսարանն ավարտելու տարիները՝ 2008-2009 թվականները, ճգնաժամային էին ԱՄՆ-ում, եւ ֆինանսական ոլորտում բարդ իրավիճակ էր ստեղծվել։ Տեխնոլոգիաներով միշտ եմ հետաքրքրվել, թեեւ մասնագիտությունս ուղիղ կապ չունի ՏՏ-ի հետ։
Առաջին ստարտափը, որին միացա, Հովհաննես Ավոյանի Monitis ընկերությունն էր, որտեղ հայկական թիմի հետ ԱՄՆ-ից էի աշխատում: Հետագայում այն վաճառվեց ու միացա մեկ այլ ստարտափի, որի հիմնադիրներն ուկրաինացիներ էին ու թիմն էլ Ուկրաինայում էր գտնվում: Նրանց հետ աշխատեցի 3 տարի, կարելի է ասել, չհաջողեցինք, սակայն շատ փորձ ձեռք բերեցի:
Այնուհետեւ UCLA Բիզնես դպրոցում MBA արեցի ու այն օգնեց, որ Սիեթլում Amazon Web Services-ի Արհեստական բանականության (AI) խմբում դառնամ պրոդուկտ մենեջեր: Աշխատում էի տվյալների միջոցով կանխատեսումների համար նախատեսված պրոդուկտի վրա: 100 մլն. դոլարի պայմանագրեր էինք կնքում, արդյունքում, մեծ վաճառքներ իրականացնելու փորձ ձեռք բերեցի: Հասկանում էի, սակայն, որ իմը սեփական ստարտափ ստեղծելն է:
LottoShield-ի գաղափարն ու առաջին քայլերը
Amazon-ից դուրս եկա եւ ընկերներով մի քանի ամիս 4-5 գաղափար փորձարկեցինք:
Նրանցից մեկի ընտանիքը խանութների ու գազալցակայանների ցանց ունի, պարբերաբար բախվում էին վիճակախաղերի վաճառքների խնդրին:
Ընկերոջս հետ մտածում էինք՝ ի՞նչ կարելի է անել դրանք լուծելու համար եւ մեզ մոտ գաղափար առաջացավ վաճառքն ավելի անվտանգ ու ապահով դարձնել:
Նրանք օրը 2-3 անգամ թուղթ ու գրիչով հաշվում էին վիճակախաղերի վաճառքների տվյալները, ինչը ժամանակատար էր եւ ոչ ապահով։ Մտածում էինք, թե ինչպես ավելի հեշտ հաշվել օրվա վաճառքների եւ մնացորդների տվյալները:
Քանի որ ընկերոջս ընտանիքը խանութների ցանց էր ղեկավարում, նա գրեթե բոլոր խնդիրների մանրամասները պատկերացնում էր, ինչը նույնպես օգնեց գաղափարի մշակմանը։ Այսպիսով, 2019-ին հիմնեցինք LottoShield ընկերությունը։
[[gallery1]]
Սկզբում դանդաղ էինք աշխատում, մոտ երկու տարի մշակում էինք ծրագիրը։ Պրոդուկտն ունի շատ մանրամասն դետալներ, որոնց պետք է տիրապետել ու դա դժվարացնում էր մասնագետներ վարձելիս։ Դարձա տեխնիկական գծով ղեկավար ու մեր առաջին պրոդուկտը ինքս մշակեցի՝ զուգահեռ ինքնակրթվելով: Հետո գտա թիմակիցներ, որոնք օգնեցին տեխնիկական մասով։
Հաճախորդներն ու գործառույթները
Ներկայում ԱՄՆ-ի շուրջ 25 նահանգում ավելի քան 1000 խանութ օգտագործում է մեր համակարգը, աճում ենք եւ նոր հաճախորդներ ներգրավում։
Խանութները մեր համակարգն օգտագործում են, որ գողությունից պաշտպանեն իրենց վիճակախաղերի պաշարները: Համակարգն արագ արձագանքում է եւ ծանուցումներ ուղարկում, խանութի տիրոջն օգնում է հասկանալ՝ ինչպես են կորել կամ գողացվել։ Ամենօրյա ռեժիմով կարողանում ենք վերահսկողություն սահմանել։
Եղել է, որ 10 օրվա ընթացքում մոտ 55 հազար դոլար գողացել են: Մեր համակարգով մի քանի րոպեում հնարավոր է ստուգել ու կանխել նման դեպքերը։ LottoShield-ի միջոցով հայտնաբերվել են գողության հարյուրավոր դեպքեր, որոնք հակառակ պարագայում աննկատ կմնային կամ բացահայտելու համար կպահանջվեր երկար ժամանակ: Մեր հաճախորդները LottoShield համակարգի շնորհիվ ավելի հանգիստ են քնում՝ իմանալով, որ վերահսկում ենք իրենց տվյալները:
Մրցակիցները
Սկզբում մրցակցությունը մեծ չէր։ Որոշ մրցակիցներ խանութներին առաջարկում են ընդհանուր ծրագիր, ինչը հիմնականում չի օգտագործվում: Այդ համակարգերն ավելի ժամանակատար են, բարդ, ունեն օգտագործման հատուկ կանոններ: Կենտրոնացած լուծում գրեթե չկա: Մեր համակարգը պահանջում է մի քանի րոպե: Շեշտը դրված է անվտանգության վրա։ Մեծ ցանցերը LottoShield-ի միջոցով կարողանում են ամբողջ ցանցի խնդիրները տեսնել։ Միանգամից հարյուրավոր խանութներ կարելի է կառավարել:
Թիմը
Համահիմնադիրներով երեքով ենք՝ ես եւ պարսիկ իմ ընկերներ Ռեզան եւ Մեհդին: Աշխատակիցներից ինժեները եւ հաճախորդների հաջողության ու վաճառքների մասնագետն աշխատում են հեռավար: Փոքր թիմ է, շփումները սերտ են ու ջերմ:
Ներդրումներն ու առաջիկա ծրագրերը
Ներդրումներ հիմնականում կատարել ենք անձնական միջոցներից: Մտածում էինք՝ մեր պրոդուկտը կարող է Սիլիկոնյան հովտի քիչ ներդրողների հետաքրքրել, սակայն բավականին հետաքրքրվողներ եղան:
Ներդրումային շուկան վատ վիճակում է: Մերն ընդհանուր կես միլիարդ դոլարի շուկա է ու ներդրողների համար սա, գուցե, փոքր է: Բանակցություններով մեր ուզած պայմանները չստացանք, փորձեցինք առանց ներդրողների շարունակել, ստացվեց:
[[gallery2]]
Այժմ կենտրոնացած ենք մեր համակարգի զարգացման վրա, ծրագրում ենք ընդլայնել այն ու բացի վիճակախաղերից, նախատեսում ենք խանութների համար գնագոյացման համակարգ մշակել կամ օգնել ֆինանսական գործերը կառավարելու հարցում:
Խորհուրդներ սկսնակներին
B2B բիզնեսների համար. բիզնես գաղափարը գնահատելիս համոզվեք, որ այն հաճախորդի համար ունի բարձր եկամտաբերություն (ROI): Հաճախորդի համար ստեղծված արժեքը պետք է մի քանի անգամ ավելի մեծ լինի, դա ոչ միայն գումար է, այլեւ՝ ժամանակ ու ջանք, որ ներդնում է հաճախորդը: Վերջնարդյունքում համոզվեք, որ ձեր ստեղծած արժեքն ավելի մեծ է, եթե այդպես չէ, ձեր պրոդուկտը դժվար կվաճառվի:
Հայաստանում մի միտում կա՝ գրեթե բոլորը ցանկանում են միանգամից միջազգային շուկա դուրս գալ: Սակայն հայկական շուկան փոխվել է, ինտեգրված է միջազգային շուկաներին։ Եթե Հայաստանում ստեղծեք պրոդուկտ, որը կսիրեն հաճախորդները, հավանականությունը մեծ է՝ այն կարող եք նաեւ արտահանել:
Նունե Գրիգորյան
