Ամեն տարի գիտնականները իրենց հետազոտությունների էությունը արտացոլող լուսանկարներ են ուղարկում Science Exposed ֆոտոմրցույթին․․․
The post Ցնցող լուսանկարներ միկրո ու այլ աշխարհներից first appeared on Epress.am.Բնական գիտությունների և տեխնիկական հետազոտությունների կանադական խորհուրդը (NSERC) ամեն տարի գիտնականներին առաջարկում է իրենց հետազոտությունների էությունը արտացոլող լուսանկարներ ուղարկել Science Exposed մրցույթին։ Նկարների մեծամասնությունը ցույց են տալիս միկրոաշխարհը՝ ներկայացնելով հյուսվածքների, ոսկրերի, բյուրեղների և նանոկառուցվածքների գեղեցկությունը։
Այս տարվա մրցույթը դեռևս ընթացքի մեջ է․ քվեարկել հնարավոր է այստեղ։ Եզրափակիչ փուլի նկարներից ամենատպավորիչները՝ ստորև․
Կենդանի օլիգոդենդրոցիտի միկրոլուսանկար։ Օլիգոդենդրոցիտները նյարդային համակարգի օժանդակ բջիջներ են։ Նրանց վնասման դեպքում կարող են զարգանալ տարբեր նյարդաբանական հիվանդություններ, այդ թվում՝ ցրված սկլերոզ։
Արհեստականորեն աճեցված ուռուցքային հյուսվածքի իմունոհիստոքիմիական միկրոլուսանկար, որը ստացել են ուռուցքային բջիջներով գելը թղթի վրա քսելով։ Թուղթը նկարում կանաչ գույնով է, իսկ ուռուցքի բջիջները՝ կարմիր և կապույտ։
Խխունջի երեք օրեկան էմբրիոններ, որոնք արդեն սկսում են տեսնել։ Նկարում սև կետիկների տեսքով երևում են նրանց ցողղունաձև աչքերը, որոնք չնայած նման չեն ողնաշարավորների աչքերին, բայց թույլ են տալիս խխունջներին կողմնորոշվել՝ տարածության մեջ լույսի, ճնշման և քիմիական ազդակների միջոցով։
Ռիդոյի ջրամբարներից մեկում նմուշներ հավաքող գիտնականները՝ նկարված 100-մետրանոց բարձրությունից։ Նմուշների միջոցով նրանք ստուգում են ջրամբարի աղտոտվածությունը կապտականաչ ջրիմուռներով։ Վերջիններս բազմանալով՝ ջուրը դարձնում են օգտագործման համար անպիտան, իսկ քայքայվելով՝ թունավորում են այնտեղ ապրող ձկներին և այլ կենդանիների։
Զմրուխտի միկրոսկոպիկ «աստիճանիկների» լուսանկար։ Հետազոտողը ոգեշնչվել է հեղուկ բյուրեղների հետ աշխատանքից, և դրանց պատկերներից, որը ստացել է բևեռացված օպտիկական մանրադիտակով։ Զմրուխտը մանրադիտակով նայելու համար՝ բյուրեղը չեզոքացրել են տոլուենով և սեղմել ապակիների միջև։
Օստեոպորոզի 3D միկրոպատկեր՝ ստացված համակարգչային մոդելավորմամբ։ Օստեոպորոզը հիվանդություն է, որի ժամանակ ոսկրերը դառնում են փխրուն և հեշտ են կոտրվում, տեղի է ունենում ոսկրային հյուսվածքի կորուստ։ Նկարում կապտավարդագույնով պատկերված են մանր ծակոտիները, կանաչադեղնավունով՝ խոշոր ծակոտիները, իսկ ոսկեգույն բծերը բջիջներ են։
Սիլիցիումի ֆտալոցիանինի բյուրեղների միկրոլուսանկար։ Սիլիցիումի ֆտալոցիանինը քիմիական միացություն է, որն օգտագործվում է օրգանական կիսահաղորդիչների բարակ թաղանթներ ստեղծելու համար։
La vie en rose (կյանքը վարդագույնով)․ լուսանկարում կորալային խութեր են, որոնք գոյանում են կորալների կրային կմախքից։ Լուսանկարի հեղինակը ցանկանում էր ընդգծել դրանց գեղեցկությունն ու կարևորությունը՝ բնական էկոհամակարգերի գործունեության մեջ։
«Մեդուզա»՝ մկների ենթատեսաթմբի (ուղեղի կառուցվածքի բաղադրիչ) նեյրոնների համակարգ։ Հեղինակները զբաղվում են նեյրոնների աճեցմամբ և ուսումնասիրությամբ՝ տարբեր նյարդաբանական հիվանդությունների առաջացման մեջ։
Ժամանակակից լիթիում-իոնայի մարտկոցի էլեկտրոդի միկրոլուսանկար՝ էլեկտրոնային մանրադիտակով։ Նման էլեկտրոդները մեծացնում են մարտկոցի հզորությունը և լիցքավորման արագությունը, ինչպես նաև հնարավոր են դարձնում դրա գործածումը ավելի երկար ժամկետներով։
Ուղեղի իմունոհիստոքիմիական միկրոլուսանկար։ Երկնագույնով երևում է միկրոգլիայի ցանցը, որն ապահովում է նեյրոնների պաշտպանությունը և նորմալ կենսագործունեությունը։ Միկրոգլիայի բջիջները կարող են քանակով մոտ 10 անգամ գերազանցել նեյրոններին։
Էնդոսկոպիկ մետաոսպնյակի միկրոլուսանկար։ Էնդոսկոպիկ հետազոտությունները (օրինակ՝ գաստրոսկոպիա) օգնում են մի շարք հիվանդույթյունների վաղ հայտնաբերմանը, այդ թվում՝ քաղցկեղի։ Մետաոսպնյակները բաղկացած են բազմաթիվ նանոմասնիկներից․ դրանց ձևը, չափը և տեղադրությունը փոփոխելով՝ հնարավոր է ապահովել օրգանների և հյուսվածքների մեծ տեսանելիություն։
Միաբյուրեղ ալյումին։ Նյութի աճի ուղղությունը մի քանի աստիճանով թեքվել է բյուրեղաչափական առանցքից, ինչի պատճառով առաջացել են դիսլոկացիայի օջախներ՝ դեֆեկտի տեսքով։ Այդ դեֆեկտները նկարում երևում են բրգանման կառուցվածքների տեսքով։
