Чăваш Енре ачасем çуралнине онлайн мелĕпе регистрацилеме пуçланă. Чăваш Енре пурăнакансем çĕртме уйăхĕн 1-мĕшĕнчен пуçласа ача çурални çинчен ĕнентерекен 11 хут илнĕ. Кун пирки юстици ĕçĕсен патшалăх службин ертӳçи Дмитрий Сержантов республика ертӳçипе иртнĕ тĕл пулура пĕлтерчĕ. Ĕçлĕ калаçура юстици ĕçĕсен патшалăх службин 2024-мĕш çулчченхи аталану çул-йĕрне те сӳтсе яврĕç. Документсене электронлă майпа регистрацилеме май пурри çемьесене пысăк пулăшу парать. Кирлĕ хутсене тума ансатрах, йăнăш та каймасть. Ача çурални çинчен ĕнтентерекен документа çемьесем патшалăх пулăшăвĕсен пĕрлехи порталĕ пулăшнипе илеççĕ. Республика Пуçлăхĕ Олег Николаев çынсем кирлĕ хутсене хăвартрах алла илме пултарнине ырларĕ. Кун çинче çеç чарăнса тăмалла мар, документсене онлайн мелĕпе илессине анлăлатма ыйтрĕ. Дмитрий Сержантов электронлă пулăшу тата та меллĕрех те хăвăртрах пуласса шантарчĕ. Çывăх вăхăтра ачана хăй пурăнакан вырăнта регистрацилеме май пулĕ. СНИЛС, ИНН, амăш капиталне илме сертификат, медицина полисне те патшалăх пулăшăвĕсен пĕрлехи порталĕ пулăшнипе илĕç. Çын вилни çинчен ĕнентерекен хута та электронлă майпа илмелле тăвĕç. Цифра тытăмне аталантарассипе республикăра пĕлтерĕшлĕ ĕçсем тăваççĕ. Çитес вăхăтра ЗАГС органĕсене электронлă реестр моделĕ çине куçармалла