Çĕнĕ Шупашкарти Андриян Николаев ячĕпе хисепленекен стадионта паян спорт уявĕ иртрĕ. Унта «Грани» хаçата вулама юратакансем, сывă пурнăç йĕркине тытакансем хутшăнчĕç. Николай Андреев хаçат вулама питĕ юратать. Хула пурнăçĕпе, хыпарсемпе паллашнисĕр пуçне сумлă редакци ирттерекен пуçарусене хаваспах хутшăнать. Тĕрĕсрех каласан пĕрре те сиктермест. Кăçал 29-мĕш хут иртекен ăмăртăва та тĕплĕ хатĕрленнĕ. НИКОЛАЙ АНДРЕЕВ: «1959-мĕш çулта çамрăксен хушшинче мала тухрăм. Пĕрремĕш вырăн йышăнтăм. Ку манăн пурнăç. Çавăнпа пурăнатăп. Эпĕ 81-ре кайнă. Аванах курăнатăп. Туртса курман, эрех ĕçме пĕлместĕп». Ăмăр çанталăка пăхмасăр шкул ачисем, тĕрлĕ предприяти ĕçченĕсем, тӳре-шара хаваспах старта тăчĕ. Пурĕ 200 ытла командăри 1500 яхăн çын спорт тупăшăвĕнче хăйне тĕрĕслерĕ. Вĕсене хавхалантаракансем те стадионта туллиех пулчĕç. «Рекордсем патне малалла», «Грани»пе чупма хаваслă» тесе старта тухакансен кăмăлне çĕклерĕç вĕсем. Галина Макарова ача садĕнче ĕçлет, çапах та эстафета çинчен пĕлсен нумай шухăшласа тăмасăрах савăнса кунта килнĕ. ГАЛИНА МАКАРОВА: «Çакăн пек мероприятисене эпир хапăлласах йышăнатпăр, мĕншĕн тесен пире питĕ килĕшет. Çакăн пек мероприятисем пуласса шансах тăратпăр. Спортпа туслă пулнăшăн питĕ савăнатпăр». Çĕнтерӳçĕсене кубокпа, дипломпа тата ытти парнепе чысларĕç. Чи пахи вара – пурте пĕрле стадиона тухса тупăшма пултарни, хаçатпа вулакан хушшинче туслăха çирĕплетни