Мердігер компания Әуезов кентіндегі Бақыршық орта мектебінің құрылысының 60 пайызын орындап болған.
- "Ауыл - ел бесігі" бағдарламасы аясында Ауданымыздағы екі бірдей ірі білім ошағы күрделі жөндеуден өтуде, - дейді аудан әкімі Ахметқали Нұрғожин. - Оның бірі - Әуезов кентіндегі Бақыршық орта мектебі. Соңғы бірнеше жыл жөндеу көрмеген ғимарат сыр беріп келген болатын. Тұрғындардың өтініші бойынша білім ордасы уақыт талабына сай жаңа кейіпке енуде. Мердігер компания қазіргі уақытта құрылыс жұмыстарын 60 пайызға орындап отыр. Яғни, нысанның төбесі, жылу және кәріз жүйелері, едендер төсеу мен ішкі сылақ жұмыстарының басым бөлігін аяқтап отыр.
Аудан әкімінің айтуынша, ғимарат қараша айында толықтай жөндеуден өтіп, қолданысқа беріледі.
- Аталмыш білім ордасы мен Абай атындағы мектеп-гимназия оқу жылының бірінші тоқсанында санитарлық талапқа сәйкес балаларды қашықтықтан оқытатын болады. Яғни, мердігерлер жөндеу жұмыстарын жобалық жоспарға сәйкес кезеңмен жүзеге асыруға көшті, - дейді аудан әкімі Ахметқали Нұрғожин.
