Шилнәбаш авыл җирлегендә бүгенге көндә бер Бөек Ватан сугышы ветераны һәм 24 тыл хезмәтчәне гомер кичерә. Күптән түгел аларга юбилей медальләре тапшыру тантанасы узды.
Анда ветераннарны Шилнәбаш мәктәбе укучылары җылы котлады. VIII сыйныф укучысы Милена Һадиева «Синий платочек» җырын, «Россияночка» вокал коллективы «Любите Россию» җырын башкардылар. Тамашачылар аларга гөрләтеп кул чапты.
Корал тотып сугышка киткән, яу кырында фашист илбасарларына каршы көрәшкән якташларыбыз белән беррәттән, тылда фронт тоткан каһарманнарыбыз алдында да без баш иябез. Аларның берничәсе турында язып үтәм.
Мария Петровна Губочкина 1929 елда Шилнәбаш авылында дөньяга килә. Сугыш башланганда аңа нибары 13 яшь була. Бөтен ир-ат фронтка китә. Авылда әби-бабайлар, хатын-кызлар һәм яшүсмерләр генә кала. Авылдагы бөтен эш шулар җилкәсенә төшә. Ул вакытларда «Коммунар» комбайн, МТЗ тракторлары булган. Хатын-кызлар махсус курсларны бетереп кайтып, «корыч атларны иярләгәннәр». Эш җитәрлек булган: кемдер дуңгыз, сарык, атлар көтүен көткән, мал караган, кемдер көннәр, төннәр буе җир сөргән. Сугыштан соң да тормышлар тиз генә рәтләнмәгән әле...
Тылда күрсәткән тырышлыклары өчен райондашыбыз Мария Губочкина, «Бөек Ватан сугышы вакытында күрсәткән батыр хезмәте өчен», шулай ук «Тыл ветераны», «Хезмәт ветераны» медальләре белән бүләкләнгән.
Пелагея Ивановна Заикина 1923 елда туа. Бүген аңа 91 яшь. 12 балалы гаиләдә үскән Пелагея Ивановнаның туганнары инде күптәннән гүр ияләре. Үзенең ике баласын да инде җирләгән. Бөек Ватан сугышы башланганда Пелагея әбинең әтисен һәм абыйсын армия сафларына алалар. Әтисе сугыштан исән кайта, тик абыйсына гына исән-сау кайтырга насыйп булмый. Сугыш вакытында Пелагея Ивановнага 17 яшь булып, ул өлкәннәр белән бер сафта эшләгән, нормасын арттырып үтәгән. Сугыш беткәннән соң да халык теләгәнен ашап яши алмаган бит! «Ул елларны тыныч кына искә алып та булмый», – дип сөйли Пелагея әби.
Пелагея Заикина «Тыл ветераны», «Бөек Ватан сугышы вакытында күрсәткән фидакарь хезмәте өчен», «Хезмәт ветераны» медальләре белән бүләкләнгән.
1922 елда туган Александра Федоровна Кузнецовага сугыш башланганда 19 яшь була. Яшьтәшләре белән бергә ул да колхоздагы бар эштә катнаша. Элеваторга орлык ташыйлар, көлтә бәйлиләр, эскертләргә салалар. «Бар да Җиңү өчен» шигаре астында армый-талмый эшлиләр.
Бүген Шилнәбаш авылының хөрмәтле кешесе, тыл ветераны Александра әбигә 93 яшь, ул килене тәрбиясендә гомер кичерә. Намуслы хезмәте өчен «Хезмәт ветераны», «Бөек Ватан сугышы вакытында күрсәткән фидакарь хезмәте өчен» һ. б. медальләр белән бүләкләнгән.
Авылыбызның тыл хезмәтчәннәре яшүсмер чагында ук хезмәт батырлыгы үрнәге күрсәткәннәр. Без алар белән чиксез горурланабыз, батырлыклары алдында баш иябез, дип хәбәр итә Шилнәбаш авылының китапханә мөдире Нурзилә Бариева.