Эрон портлари блокадаси ортидан нефт нархи кескин ошди
13 апрель куни Доналд Трамп томонидан Эрон портларини блокадага олиш бўйича берилган буйруқдан сўнг жаҳон бозорида нефт нархи кескин кўтарилди. Бу ҳақда BBC хабар берди.
Маълумотларга кўра, глобал эталон ҳисобланган Brent нефти нархи 7 фоиздан ортиқ ошиб, бир баррел учун 100 доллардан юқорига чиқди. Айрим савдоларда эса нарх 7,5 фоизга ошиб, 103 долларга яқинлашгани қайд этилган.
АҚШ Марказий қўмондонлиги 12 апрель куни кечқурун Эрон портларига ҳарбий блокада жорий этилишини маълум қилган. Ушбу чекловлар Эрон портларига кирувчи ва ундан чиқувчи барча денгиз транспортларига тааллуқли бўлиб, Форс ва Уммон кўрфазидаги ҳаракатларга ҳам таъсир кўрсатмоқда.
Шу билан бирга, Трамп Truth Social тармоғидаги баёнотида Ҳормуз бўғози орқали ҳаракатланаётган кемаларга нисбатан қатъий чоралар кўрилишини таъкидлаган. Унга кўра, АҚШ ҳарбий-денгиз кучлари ҳудуддаги назоратни кучайтириб, ҳар қандай таҳдидларга кескин жавоб қайтаради.
Мутахассислар фикрича, ушбу кескин вазият глобал энергетика бозорида беқарорликни кучайтириб, нархларнинг яна ошишига сабаб бўлиши мумкин.