Россиялик таниқли мураббий: Қандай қилиб бундай иқтидор кўздан қочирилди?
Россия футболининг энг таниқли мураббийларидан бири, Москванинг “Локомотив” жамоаси билан уч карра чемпионликка эришган Юрий Сёмин “Спорт-Экспресс” нашрига берган интервьюсида “Манчестер Сити”нинг ўзбекистонлик ҳимоячиси Абдуқодир Ҳусанов нега Россия Премьер-лигасида илгари пайқалмаганига ҳайрон бўлди.
Сёминнинг таъкидлашича, Ҳусанов оддий ўйинчи эмас, балки катта салоҳиятга эга ҳақиқий кашфиёт ҳисобланади. Унинг фикрича, футболчи Европа йўлида босқичма-босқич ўсган: аввалига Ўзбекистонда, кейин Беларусда, сўнг Францияда ўйнаб, охири Англияга етиб келган.
Мураббий шу ўринда савол билан мурожаат қилади: “Бизнинг селекционерлар қаерда эди? Қандай қилиб бундай иқтидор кўздан қочирилди?” — дея танқид қилди у.
Сёмин футболни ва футболчини кўра билиш муҳимлигини таъкидлаб, “Локомотив”да Хвича Кварацхелия ҳам ўз вақтида қўлдан чиқариб юборилганини эсга олди. Унинг айтишича, Пеп Гвардиола Ҳусановдаги истеъдодни тўғри баҳолаб, уни жамоага жалб этган.
Мутахассис Ҳусановнинг универсаллигига ҳам алоҳида тўхталди — у марказий ҳимояда ҳам, қанотда ҳам бирдек самарали ҳаракат қила олади, бу эса кам учрайдиган сифат эканини айтди.
"Гвардиола эса бу “олмос”ни кўра олди ва жамоасига олиб келди. Ҳусанов марказий ҳимояда ҳам, қанотда ҳам сифатни йўқотмасдан ўйнай олади, бу эса кам учрайдиган ноёб истеъдод.
Абдуқодир ҳали жуда ёш бўлишига қарамай, Пепдек юқори даражадаги мураббий унга энг муҳим ўйинларда ишонч билдирмоқда”, — деди Сёмин.
Сёминнинг фикрича, ёш футболчи “Манчестер Сити”даги кучли рақобат, юқори босим ва тўлиқ трибуналар муҳитида ҳам ўз ўрнини топа олган.
“Ҳусановни икки марта ойнинг энг яхши футболчиси деб танлашди — бу бежиз эмас. У яхши ўйнамоқда. Лекин энг муҳими — уни стереотипларсиз тўғри кўра билиш керак эди. Агар у РПЛга чақирилганида, албатта борган бўларди. Аммо уни пайқамадилар — асосий муаммо мана шу”, — деди Сёмин.
Эслатиб ўтамиз, Абдуқодир Ҳусанов фаолиятини “Бунёдкор” академиясида бошлаган, кейин Беларуснинг “Энергетик-БГУ” клубида профессионал йўлга чиққан. 2023 йилда Франциянинг “Ланс” жамоасига ўтган, кейин эса 40 миллион евролик трансфер орқали “Манчестер Сити”га қўшилган.
Ҳозирги кунда у “шаҳарликлар”нинг асосий таркиб футболчиси ҳисобланади ва Гвардиола қўл остида бир нечта индивидуал совринлар ҳамда Англия Лига кубогини қўлга киритган.