Гўшт нархини тушириш учун янги субсидия киритилди
Ўзбекистонда аҳолини асосий озиқ-овқат маҳсулотлари билан таъминлаш ва бозорда нархлар барқарорлигини сақлаш мақсадида гўшт импорти билан шуғулланувчи тадбиркорларга янги имтиёзлар жорий этилмоқда.
Президент томонидан жорий йил 7 апрел куни қабул қилинган “Аҳолини асосий турдаги озиқ-овқат маҳсулотлари билан таъминлашни қўллаб-қувватлашнинг қўшимча чора-тадбирлари тўғрисида”ги қарорга мувофиқ, мол ва қўй гўштини импорт қилувчи тадбиркорларга давлат томонидан вақтинчалик субсидиялар берилади.
Қарорга кўра, 1 апрелдан 1 августга қадар хориждан мол ва қўй гўштини ҳаво транспорти орқали олиб кириш харажатларининг 50 фоизи қоплаб берилади. Бироқ ҳар бир килограмм маҳсулот учун ажратиладиган субсидия миқдори 0,8 АҚШ долларидан ошмаслиги белгиланган.
Шунингдек, 1 апрелдан 31 декабргача хориждан ҳаво транспорти орқали импорт қилинган наслдор қорамоллар бўйича ҳам қўллаб-қувватлаш тизими амал қилади. Унга кўра, уларнинг қийматининг 10 фоизи давлат томонидан қопланади, лекин ҳар бир бош қорамол учун 4 миллион сўмдан кўп бўлмаган миқдорда.
Мазкур субсидиялар Аграр соҳада тўловлар агентлиги орқали молиялаштирилади. Мутахассислар фикрича, бу чоралар келгусида гўшт бозорида таклифни ошириб, нархларни барқарор сақлашга хизмат қилиши мумкин.