Пит Ҳегсет: АҚШ “Эрон мудофаа саноатини тўлиқ йўқ қилиш”ни якунлади

Яқин Шарқдаги кескин вазият фонида АҚШ расмийлари Эронга қарши ҳарбий амалиётлар натижалари бўйича муҳим баёнотлар билан чиқиш қилди. Мамлакат мудофаа вазири Пит Ҳегсетнинг таъкидлашича, уруш давомида Америка қўшинлари Эроннинг ракета ишлаб чиқариш инфратузилмасини тўлиқ йўқ қилишга эришган.

Унинг сўзларига кўра, бу операция АҚШ ҳарбий миссиясининг марказий ва устувор қисми бўлган. «Биз Эрон мудофаа саноатини деярли бутунлай издан чиқардик. Энди улар ракета ишлаб чиқара олмайди», — дея қатъий фикр билдирди Ҳегсет. Шунингдек, у Эрон нафақат ракета, балки бошқа илғор турдаги қурол-яроғларни ишлаб чиқариш имкониятидан ҳам маҳрум бўлганини қўшимча қилди.

Бу орада Қўшма штаб бошлиқлари қўмитаси раиси Дэн Кейн ҳам вазиятга изоҳ бериб, Америка армияси ҳар қандай сценарийга тайёр эканини билдирди. Унинг таъкидлашича, агар Доналд Трамп томонидан тегишли буйруқ берилса, ўт очишни тўхтатиш бўйича келишув муддати тугаши биланоқ Эронга қарши зарбалар яна қайта бошланиши мумкин.

«Аниқ айтаман: ўт очишни тўхтатиш — бу фақат вақтинчалик танаффус. Қуролли кучлар эса ҳар доимгидек жанговар шай ҳолатда турибди», — деди Кейн. Бу эса минтақадаги вазият ҳали барқарор эмаслигини ва ҳар қандай пайтда яна кескинлашиши мумкинлигини англатади.

Ҳегсет ҳам бу фикрни қўллаб-қувватлаб, Америка қўшинлари доимий равишда юқори тайёргарликда турганини билдирди. Унинг айтишича, АҚШ ҳарбийлари вазиятни диққат билан кузатмоқда ва Эроннинг ўт очишни тўхтатиш режимига қанчалик амал қилаётганини таҳлил қилиб бормоқда. «Биз ҳеч қаерга кетмаймиз. Ҳар қандай вазиятда ҳаракат қилишга тайёрмиз», — деди у.

Аввалроқ, 7 апрель куни Доналд Трамп АҚШ барча ҳарбий мақсадларига эришганини маълум қилиб, икки ҳафталик ўт очишни тўхтатиш бўйича келишув эълон қилинганини билдирган эди. Унинг таъкидлашича, бу келишувга кўра, Эрон стратегик жиҳатдан муҳим бўлган Ҳўрмуз бўғозини кема ҳаракати учун очишга розилик берган.

Бироқ Теҳрон бу вазиятни бошқача баҳоламоқда. Эрон расмийлари сулҳни ўз ғалабаси сифатида кўрсатиб, Вашингтон мамлакатнинг Ҳўрмуз бўғози устидан назоратини амалда тан олганини таъкидламоқда.

Эслатиб ўтиш жоиз, ушбу уруш 28 феврал куни АҚШ ва Исроил томонидан Эронга берилган кучли зарбалар билан бошланган эди. Бу ҳужумлар оқибатида олий раҳбар Али Хоминаий ҳамда режимнинг ўнлаб юқори лавозимли вакиллари ҳалок бўлгани хабар қилинган. Жавоб тариқасида Теҳрон Исроил, Форс кўрфази давлатлари ва минтақадаги Америка объектларига ракета ва дронлар орқали зарбалар берган.

Қисқаси, ҳозирча ўт очиш тўхтатилган бўлса-да, вазият ҳали ҳам «пауза» режимида. Яъни бу ўйин тугамаган — фақат бир тайм тугади, холос. Кейинги босқич қандай бўлиши эса сиёсий қарорлар ва ҳарбий ҳаракатларга боғлиқ.