Доналд Трамп Эронга қарши ҳужумларни икки ҳафтага тўхтатди
Жаҳон сиёсий майдонида кескинлик юқори чўққига чиққан бир пайтда, Доналд Трам кутилмаган қарор қабул қилди. 8 апрелга ўтар кечаси АҚШ томонидан Эрон раҳбариятига қўйилган ултиматум муддати якунланар экан, Вашингтон расман ҳарбий ҳаракатларни вақтинча тўхтатишга рози бўлганини эълон қилди.
Маълум қилинишича, мазкур қарор Ҳўрмуз бўғози масаласи билан бевосита боғлиқ. АҚШ томонидан бу стратегик денгиз йўли «тўлиқ, тезкор ва хавфсиз шартларда» очилиши шарти қўйилган. Айнан шу талаб ижроси эвазига Эронга қарши ҳужумлар икки ҳафта муддатга тўхтатилмоқда.
Трампнинг баёнотига кўра, АҚШ ўз олдига қўйган ҳарбий мақсадларга «ортиқча даражада эришган». Шу билан бирга, у Эрон томонидан илгари сурилган ва музокаралар учун асос бўлиши мумкин бўлган 10 банддан иборат таклиф қабул қилинганини таъкидлади. Унинг фикрича, икки давлат ўртасидаги асосий келишмовчиликлар бўйича деярли келишувга эришилган.
Орадан кўп ўтмай, Трамп яна бир мурожаат билан чиқиб, Ҳўрмуз бўғози ҳудудида тўпланиб қолган кемалар муаммосини ҳал қилишда АҚШ фаол иштирок этишини билдирди. У бу жараённи «ижобий ўзгаришлар бошланиши» деб баҳолаб, иқтисодий фаоллик ортиши ва катта молиявий имкониятлар пайдо бўлишини таъкидлади. Шунингдек, Эрон учун тикланиш даври бошланиши мумкинлигини айтди ва ҳатто Яқин Шарқда «янги олтин давр» бошланиши эҳтимолини ҳам тилга олди.
Қизиғи, айнан шу воқеалардан бир неча соат олдин Трамп анча кескин руҳдаги баёнот билан чиққан эди. У эҳтимолий зиддият бутун бир цивилизация учун ҳалокатли оқибатларга олиб келиши мумкинлигини таъкидлаб, бундай жараён «ортга қайтариб бўлмас» даражада бўлишини айтган. Шу билан бирга, у ҳокимиятга янада оқилона ва мувозанатли кучлар келса, вазият кескин бурилиш ясаши мумкинлигини ҳам истисно қилмади.
Ҳозирча эълон қилинган икки ҳафталик танаффус — бу фақат вақтдан ютишми ёки ҳақиқий музокаралар бошланишига заминми, буни яқин кунлар кўрсатади. Аммо битта нарса аниқ: глобал сиёсатдаги бу «пауза» кейинги катта ҳаракат олдидан ташлаб қўйилган сукунатга ўхшаб турибди.