Эрдўғон АҚШ ва Эрон ўртасидаги вақтинчалик тинчликни олқишлади
Туркия Президенти Ражаб Тоййиб Эрдўғон АҚШ ва Эрон ўртасида ўрнатилган вақтинчалик тинчликдан мамнунлигини билдирди.
Эрдўғон бу фикрларини шахсий ижтимоий тармоқ саҳифасида эълон қилди. У сўзларида кеча кечқурун можарода эълон қилинган сулҳни олқишлаганини, минтақада 28 февралдан бери давом этаётган ҳарбий ҳаракатлар фонида бундай келишувнинг аҳамияти катта эканлигини таъкидлади.
Туркия раҳбари сулҳ шартларига тўлиқ риоя қилинишини, ҳар қандай провокация ёки саботаж ҳолатларига йўл қўйилмаслигини кутаётганини билдирди. Шунингдек, у келишувга ҳисса қўшган барча давлатларни, хусусан дўст ва биродар Покистонни самимий табриклади.
Эрдўғон минтақада тез орада барқарорлик, осойишталик ва тинчлик тикланишига умид билдирди.