Тошкентда итлар устига машина ҳайдаганлар судга берилди

Тошкентнинг Учтепа туманида икки шахс итларни машина устига ҳайдагани учун суд қарорига тўсилди. Бу ҳақда пойтахт ИИББ матбуот хизмати маълум қилди.

Ижтимоий тармоқларда тарқалган видеода икки фуқаро ўз автомашиналарида кучукларни ҳайдаётгани акс этган бўлиб, турли баҳс-мунозараларга сабаб бўлди. Расмий маълумотларга кўра, 5 апрель куни соат 23:00 атрофида Учтепа туманидаги бозорларда қоровул сифатида ишловчи 1997-йилда туғилган Т.М. ва 1996-йилда туғилган М.Д. ўз автомобилларида кучукларни устига ҳайдаган.

Ҳодиса юзасидан Учтепа тумани ИИО ФМБ томонидан Маъмурий жавобгарлик тўғрисидаги кодекснинг 111-моддаси (ҳайвонларга нисбатан шафқатсиз муносабат) бўйича маъмурий баённома расмийлаштирилди. Ҳужжатлар туман судига юборилган ва айбдор бўлган шахслар БҲМнинг 3–5 баравари (1 236 000 сўмдан 2 060 000 сўмгача) миқдорида жаримага тортилиши мумкин.

Шу билан бирга, 4 апрель куни Ўзбекистон Экологик партияси ҳайвонларга нисбатан шафқатсиз муносабат учун алоҳида қонун лойиҳаси тайёрлаётганини маълум қилди. Лойиҳада жиноий жавобгарликни кучайтириш, жарималарни базавий ҳисоблаш миқдорининг 200 бараваригача (82 400 000 сўм) ошириш ёки бир йилгача озодликдан маҳрум қилиш таклиф этилмоқда.

Бундан аввал ҳам Тошкент вилояти Бўстонлиқ туманида мушук болаларига нисбатан шафқатсизлик қилган шахслар 15 ва 10 сутка муддатга қамалгани хабар қилинган эди. Ушбу видеоларда улар мушукларни аёвсиз тепиб, отиб ўлдириб, бўйнидан осиб қўйгани акс этган ва жамоатчилик муҳокамаларига сабаб бўлган.