Трамп АҚШ молиявий эътиборини мудофаага қаратиш кераклигини айтди

АҚШ президенти Доналд Трамп федерал ҳукуматнинг молиявий ресурслари соғлиқни сақлаш соҳаси ва болалар боғчаларига эмас, балки давлат мудофаа тизимини кучайтиришга йўналтирилиши кераклигини таъкидлади. Унинг фикрига кўра, шу каби ижтимоий дастурлар билан штатлар раҳбарлари шуғулланиши лозим. Бу ҳақда 2 апрель куни CNN нашри хабар берди.

Трамп бу фикрларни 1 апрель куни Пасха байрами муносабати билан ташкил этилган ёпиқ учрашув вақтида билдирган. Унинг сўзлари акс этган видеоёзув аввал Оқ уйнинг расмий YouTube каналига жойланган, кейин олиб ташланган, аммо Business Insider нашри журналисти уни сақлаб олган.

Шу учрашувда президент Маъмурий-бюджет бошқармаси раҳбари Рассел Воут билан суҳбатини эслаб, болалар боғчаларига пул ажратмаслик кераклигини ва бу масала штатлар ваколатида бўлиши лозимлигини таъкидлаган: «Биз – катта мамлакатмиз, 50 та штат бор, бунинг учун бошқалар ҳам масъул бўлиши керак». Кейин у шундай қўшимча қилган: «Биз жанг қиламиз. Биз болалар боғчалари билан шуғуллана олмаймиз».

Трампнинг фикрига кўра, болалар боғчалари ва соғлиқни сақлаш дастурларини молиялаштириш учун штатлар солиқларни кўпайтириши мумкин. «Федерал даражада бунинг иложи йўқ, биз бир иш билан шуғулланишимиз керак: ҳарбий мудофаа билан. Миллатни ҳимоя қилишимиз лозим», деди у.

Оқ уй матбуот котиби Кэролайн Ливитт 2 апрель куни билдиришича, Трамп ўз нутқида «сайланган демократик амалдорлар йўл қўйган дастурларда фирибгарликка чек қўйиш ва миллиардлаб долларларнинг илдизини қуритиш муҳимлиги» ҳақида ҳам гапирган.

CNN таъкидлашича, Трамп асосан ким учун ким тўлаши кераклиги ҳақида фикр билдирган бўлса-да, шу сўзлар Эрон билан уруш бўйича миллатга мурожаатидан бир неча соат олдин айтилган эди. У ўз мурожаатида АҚШ ғалаба қозонишга яқин эканини таъкидлади, аммо уруш қачон тугашини аниқ айтмади.