Трамп баёнотидан сўнг Макрон жавоб қайтарди ва кескин танқид қилди
Франция президенти Эммануел Макрон АҚШ раҳбари Доналд Трамп томонидан айтилган баҳсли фикрлар ортидан жамоатчилик эътиборида қолмоқда. Хусусан, Трампнинг “Макрон ҳали ҳам хотинининг зарбасидан ўзига келмаган” деган кескин ва шов-шувли баёноти катта муҳокамаларга сабаб бўлди.
Шундан сўнг Макрон самолётдан тушар экан, рафиқасининг қўлини ушлаб чиққан ҳолати кузатилди. Бу ҳолат айримлар томонидан рамзий жавоб сифатида баҳоланди.
Франция раҳбари шунингдек, Трампнинг халқаро сиёсатга оид чиқишларини ҳам танқид қилди. Айниқса, Ҳормуз бўғози атрофидаги вазият юзасидан билдирилган фикрларни у изчил эмас деб ҳисоблайди.
“Агар сиз ҳақиқий сиёсатчи бўлсангиз, ҳар куни турлича баёнот бермаслигингиз керак. Кеча айтган гапингиз бугунгисига мос келиши лозим. Энг муҳими, амалий ҳаракат қилиш, кескинликни пасайтириш ва узоқ муддатли тинчликка эришишдир”, — деди Макрон.
Шу билан бирга, Франция президенти расмий ташриф билан Жанубий Кореяга етиб боргани маълум қилинди. Сафар доирасида қатор муҳим учрашувлар ўтказилиши кутилмоқда.
Мутахассислар таъкидлашича, бу каби баёнотлар халқаро сиёсий майдондаги кескинликни янада ошириши ва етакчилар ўртасидаги муносабатларга таъсир кўрсатиши мумкин.