Тошкентда коррупция фош бўлди: мансабдор пора олганда ушланди
Тошкент шаҳрида коррупция факти аниқланди. Бу ҳақда Давлат хавфсизлик хизмати маълумот берди.
Маълум қилишларича, ДХХнинг Тошкент шаҳар бошқармаси ҳамда пойтахт ИИББ ходимлари ҳамкорликда тезкор ва мақсадли тадбир ташкил этди. Тадбир давомида Қурилиш ва уй-жой коммунал хўжалиги вазирлиги бош мутахассиси Тошкент шаҳридаги кўп қаватли уйларга хизмат кўрсатувчи МЧЖ раҳбаридан 1 500 АҚШ доллари пора олган вақтда ушланди.
Қўлга олиш жараёнида вазирлик бош мутахассиси қочишга уринган бўлса-да, тезкор ходимлар уни дарҳол ушлаб қолди.
Текширув маълумотларига кўра, у Юнусобод туманидаги 6 та уйга хизмат кўрсатиш ҳуқуқини бир МЧЖдан бошқа МЧЖга ўтказишга оид уй-жой мулкдорлари имзолаган далолатномаларни “Менинг уйим” платформасида рўйхатдан ўтказиб беришни ваъда қилган. Шунинг эвазига 2 200 АҚШ доллари талаб қилган. У бу жараённи ўз мансабдор танишлари орқали ҳал қилишни режалаштирган.
Ҳозирда бош мутахассисга нисбатан жиноят иши қўзғатилган ва тергов ҳаракатлари фаол давом этмоқда.