Россия нефти Кубага етиб борди ва АҚШ бунга изоҳ берди
Россия томонидан Кубага 100 минг тонна ҳажмдаги хом нефть етказиб берилгани маълум қилинди. Мазкур юкни олиб келган “Анатолий Колодкин” номли танкер Куба ҳудудига етиб келиб, Матансас портида тушириш жараёнини кутмоқда.
Ушбу воқеа халқаро майдонда муҳокамаларга сабаб бўлди. Хусусан, АҚШ расмийлари бу масалага муносабат билдириб, мазкур ҳолат Вашингтоннинг Гаванага нисбатан сиёсатида ўзгариш юз берганини англатмаслигини таъкидлади.
Оқ уй матбуот котиби Каролин Левитт журналистлар саволларига жавоб берар экан, бу етказиб бериш сиёсий йўналишдаги ўзгариш эмаслигини алоҳида қайд этди. Унинг сўзларига кўра, АҚШнинг Кубага нисбатан сиёсати ўзгаришсиз қолмоқда.
Шунингдек, Россия президенти матбуот котиби Дмитрий Песков ҳам ушбу масалага изоҳ берди. Унинг айтишича, Россия томонидан Кубага нефть маҳсулотларини етказиб бериш масаласи АҚШ билан олиб борилган мулоқотлар чоғида аввалдан муҳокама қилинган.