Таниқли мутахассис миллий терма жамоамизнинг ўйинини таҳлил қилди...
Ўзбекистон миллий терма жамоаси янги халқаро “FIFA Series” турнирида буюк ютуққа эришди. Ҳал қилувчи баҳс “Бунёдкор” стадионида Венесуэла термасига қарши бўлиб ўтди. Асосий вақтда ҳисоб очилмади, аммо пенальтилар сериясида 5:4 ҳисобида Фабио Каннаваро шогирдлари ғалаба қозониб, мусобақа ғолибига айландилар. Бу эса миллий жамоамиз учун яна бир тарихий дам бўлди.
Таниқли мутахассисларимиздан Ислом Аҳмедов терма жамоамизнинг Венесуэлага қарши ўтказган ўйинини батафсил таҳлил қилди. Унинг фикрича, бундай ўйин стратегиясида ҳар бир футболчи майдондаги вазифасини аниқ билиши ва тезкор ҳаракат қилиши шарт.
Аҳмедов таъкидладики, рақиб ҳужумга ўтганида жамоамиз фаол прессинг қўллаб, рақибни хато қилишга мажбур қилади. Агар рақиб тўпни назорат қилса, позицион ҳимояга ўтиш ва тўпни олиб қўйгач тезкор ҳужум ташкил қилиш талаб этилади. Жамоамиз тўпга эгалик қилганда эса қанот ўйинчиларидан фойдаланиб, тўпни олдинга вертикал узатиш ва учинчи зонада индивидуал ҳаракатлар билан ҳужумни якунлаш муҳим.
“Бундай услубда ўйнаш жуда қийин, аммо мураббийимиз жамоани жаҳон чемпионатига тайёрлаётганини англаш мумкин”, – дейди Аҳмедов. Унинг сўзларига кўра, футболчилар ушбу режани тушунишда ажойиб ҳаракат қилди ва майдонда барча кўрсатмаларни бажаришга ҳаракат қилди.
"Мураббий ўзининг сўнгги интервьюларидан бирида Суперлига жамоаларининг чемпионат даражасидан хавотирланаётганини айтган эди. Венесуэла билан ўйинни томоша қилгач, у ҳар бир футболчи ва жамоанинг умумий ўйинида нимани кўришни истаётганини кўрдим. Унинг хавотирини жуда яхши тушунаман”, – дейди Аҳмедов.
Турнир якунлангач, футболчилар ўз клубларига қайтиб, ушбу режимда ва талабларда ишлашни давом эттириши мураббий учун энг асосий саволга айланади. Бу эса терма жамоамизнинг келажакда ҳам юқори натижаларга эришиш имконияти ҳақида умид беради.
Мухлислар учун бу ғалаба нафақат қувонч, балки Ўзбекистон футболининг янги босқичга кўтарилаётгани рамзи бўлди.