Ётоқхонада туғилган чақалоқ фожиаси: талаба тақдири ҳал қилинди

Қозоғистоннинг Павлодар шаҳрида юз берган даҳшатли воқеа жамоатчиликни ларзага солди. Талаба қиз талабалар ётоқхонасида дунёга келтирган чақалоғини ҳаётдан маҳрум этгани маълум бўлди. Бу ҳақда маҳаллий ОАВ хабар тарқатди.

Маълум бўлишича, у икки йилдан ортиқ вақт давомида бир йигит билан яқин алоқада бўлган. Бироқ, йигит қиз ҳомиладор эканини билгач, болани тан олишдан бош тортган.

Суд ҳужжатларида келтирилишича, қиз бутун ҳомиладорлик давомида ўз ҳолатини ота-онаси ва атрофидагилардан яширишга ҳаракат қилган. 2025 йил октябрь ойида у талабалар ётоқхонасидаги ҳаммомда тўлиқ шаклланган қиз фарзандни дунёга келтирган.

Туғруқдан сўнг у оғир руҳий босим ҳолатида бўлган. Чақалоқнинг йиғиси унинг сирини ошкор қилиб қўйишидан қўрққан ҳолда, болани сочиққа ўраб, нафас олиш йўлларини тўсиб қўйган. Натижада гўдак вафот этган.

Айбланувчи ўз кўрсатмасида ёлғиз фарзанд тарбиялашга тайёр эмаслигини, шунингдек, яқинларининг танқиди ва босимидан қўрққанини айтган. Суд жараёнида у айбини тўлиқ тан олган.

Текширув давомида аниқланишича, қизнинг онаси бу воқеа ҳақида гуруҳ сардоридан хабар топган. Сардор ётоқхонага келиб, қизнинг аҳволи оғирлигини кўриб, тез ёрдам чақирган. Чақалоқнинг жасади эса ҳуқуқни муҳофаза қилувчи идоралар томонидан олиб кетилган.

Мазкур иш қисқартирилган тартибда кўриб чиқилди ва Жиноят кодексининг 100-моддаси — “она томонидан янги туғилган чақалоқни туғруқдан кейинги руҳий оғир ҳолатда ўлдириш” сифатида баҳоланди. Оғирлаштирувчи ҳолатлар аниқланмаган. Енгиллаштирувчи омиллар сифатида айбини тан олиши, чин кўнгилдан пушаймонлиги, илгари судланмагани ва ёшлиги инобатга олинган.

Суд қарорига кўра, қиз айбдор деб топилиб, унга 2 йил муддатга озодликни чеклаш жазоси тайинланди. Шунингдек, унга яшаш манзилини рухсатсиз ўзгартирмаслик ва кўнгилочар жойларга бормаслик каби талаблар қўйилди.

Бундан ташқари, жазо муддати давомида у кунига 4 соатдан ошмаган ҳолда жами 100 соат мажбурий жамоат ишларида иштирок этиши шарт.