"Милан" клуби Рафаэль Леауни сотиб юборишга тайёрланмоқда

Италиянинг машҳур “Милан” клуби португалиялик тезкор вингер Рафаэль Леауни сотишни кўриб чиқмоқда. Бу ҳақда итальян нашри La Gazetta dello Sport хабар берди.

Манба маълумотларига кўра, аввал клуб футболчини қўйиб юборишни истисно қилган, аммо “Лацио”га қарши ўйиндаги ҳаракатлари раҳбариятнинг фикрини ўзгартирди. Энди “россонерилар” Леау бўйича келадиган ҳар қандай таклифни кўриб чиқишга тайёр.

Футболчининг шартномасида 170 миллион евролик товон пули кўрсатилган, аммо клуб бу суммани ҳеч ким тўламайди, деб ҳисоблайди. Шу боис, 80 миллион евро ва ундан юқори таклифлар эътиборга олинади.

Ҳодиса “Лацио”га қарши баҳсда бош мураббий Массимилиано Аллегри 66-дақиқада Леауни алмаштирганидан кейин футболчининг жамоадошлари билан тортишувга тушиши билан боғлиқ.

Вингернинг “Милан” билан амалдаги шартномаси 2028 йилнинг ёзига қадар амал қилади, унинг бозор қиймати Transfermarkt маълумотларига кўра 70 миллион евро.

Жорий мавсумда португалиялик футболчи 24 та учрашувда майдонга тушиб, 10 та гол ва 3 та голли узатмани амалга оширди. Эндиликда клуб ва Леаунинг келажак стратегияси мухлислар диққат марказида бўлиб турибди.