Ламин Ямал Муҳаммад Салоҳ билан учрашади
Испания 2026 йилги Finalissima доирасида Аргентина билан режалаштирилган ўйин бекор қилингач, март ойидаги тақвимини тезда қайта тузди. UEFA ҳудуддаги сиёсий вазият сабаб учрашувни ўтказиб бўлмаслигини билдирди ва бу Ламин Ямал ҳамда Лионель Месси ўртасидаги қарама-қаршилик ҳақидаги умидларни йўққа чиқарди. Бу ҳақда Goal.com хабар беради.
Бунинг ўрнига, Marca хабарига кўра, Миср федерацияси RFEF таклифини қабул қилганидан сўнг Испания 31 март куни Мисрга қарши ўртоқлик учрашуви ўтказади. Миср бош мураббийи Ҳоссам Ҳасан бу ўйинни маъқуллади ва ҳар икки жамоа Жаҳон чемпионатига пухта тайёргарлик кўришни мақсад қилаётган бир пайтда, меҳмонлар таркибидаги энг йирик ном Муҳаммад Салоҳ бўлиши кутилмоқда.
Испания аввалроқ 27 март куни Сербияга қарши яна бир ўртоқлик учрашувини ҳам келишиб олганди. Бу ўйин Доҳадаги режалаштирилган турнир ҳам бекор қилингани ортидан, халқаро танаффус вақтида бир нечта терма жамоалар янги рақиб излашига тўғри келган бир пайтда, Вильярреалнинг Estadio де ла Ceramica стадионида ўтказилади.
UEFA Испания-Аргентина ўртасидаги тўқнашувни сақлаб қолиш учун бошқа йўлларни ҳам кўриб чиққан, жумладан уни Santiago Bernabeuда ўтказиш, бошқа Европа аренасига кўчириш ёки икки учрашувли форматга айлантириш вариантлари муҳокама қилинган. Бироқ, хабарларга кўра, Аргентина бу вариантларни рад этиб, фақат 31 март санасини таклиф қилган ва бу Испания режаларига мос келмаган.
Энди бу ўртоқлик учрашувлари 2026 йилги Жаҳон чемпионати олдидан сўнгги синовлар бўлиши кутилмоқда. Испания Ҳ гуруҳида Кабо-Верде, Саудия Арабистони ва Уругвай билан майдонга тушади, Миср эса дастлабки жадвалдаги ўзгаришлардан сўнг Г гуруҳида Бельгия ва Янги Зеландия билан бирга жой олган.