Ўзбекистонда AI-92 бензин нархи бир кунда кескин кўтарилди

Ўзбекистон хомашё бозорида AI-92 бензини қиймати қисқа вақт ичида сезиларли равишда ошгани маълум бўлди. Бу ҳақда Ўзбекистон Республикa товар-хомашё биржаси (ЎзРТХБ) томонидан тақдим этилган сўнгги маълумотларда қайд этилди.

Маълум қилинишича, AI-92 маркали бензин нархи бир кун давомида 7,4 фоизга кўтарилиб, бир тоннаси 12,72 миллион сўмгача етган.

Мутахассислар таъкидлашича, нархнинг бундай ўсиши савдо ҳажмининг кескин камайиши билан бир вақтга тўғри келган. Бозордаги тақчиллик ва нарх динамикаси туфайли биржада сотилган ҳамда рўйхатдан ўтган бензин миқдори икки баравардан ортиққа қисқарган.

Маълумотларга кўра, 13 март куни бозорда жами 3784 тонна бензин сотилган бўлса, 10 март куни бу кўрсаткич атиги 1835 тоннани ташкил этган.

Иқтисодчи Отабек Бакиров эса ўзининг Telegram даги канали орқали ёқилғи бозоридаги ҳозирги вазият юзасидан танқидий муносабат билдириб, қуйидаги фикрларни ёзиб қолдирган.

“Биз бунга тайёр эдик, бу ҳолатни олдиндан тахмин қилгандик: бензин қиймати кескин қимматлашди. Байрамдан кейинги дастлабки биржа савдоларида 92 тоифадаги бензин тоннаси 878,9 минг сўмга ёки 7,4 фоизга ошиб, 12,7 миллион сўмдан юқори кўрсаткичга етди.

Аввал ҳам кўп бор таъкидланганидек ва тахмин қилинганидек, нефть нархининг кўтарилиши олигархия ҳамда монополистлар учун яна бир қулай баҳонага айланди. Бунинг устига метан заправкалар қачон қайта очилиши ҳақида ҳам аниқ маълумот берилмасдан ёпиб қўйилган”, — деб ёзган у.